ONG Estrela+ disemina informasaun baziku HIV-AIDS, impaktu estigma diskriminasaun iha Pante Makassar. Imajen Tatoli/Abílio Elo Nini.

OÉ-CUSSE, 15 novembru 2021 (TATOLI) — Organizasaun Naun Governamentál (ONG) Estrela+ parséria ho Ministériu Saúde (MS) no Prevedoria Direitu Humanu no Justisa (PDHJ) disemina informasaun bázika ba entidade sira iha Pante Makassar kona-ba impaktu Human Immunodeficiency Virus-Acquired Immunodeficiency Syndrome (HIV-AIDS).

“Atu informa ba komunidade no entidade relevante hodi hasa’e sira-nia koñesimentu kona-ba impaktu moras HIV-SIDA, tanba kada tinan númeru afeitadu sa’e, entaun presiza habelar informasaun ba públiku nune’e, impaktu kazu ne’e mai hosi ne’ebé, nune’e bele hamutuk redus,” Sekretária Ezekutiva ONG Estrela+, Ines S. Lopes ko’alia iha salaun Alfândega, Palaban, segunda ne’e.

Durante ne’e ONG Estrela+ hala’o ona advokasia iha fatin barak no munisipíu sira haree ba direitu hetan asessibilidade ba atendimentu saúde no justisa legál, tanba komunidade ne’ebé infetadu ba kazu HIV-AIDS dalaruma hetan diskriminasaun ho razaun, kondisaun grave, transjéneru feto no mane.

Entaun presiza disemina informasaun ne’e ba autoridade lokál, polísia komunitáriu, sosiedade sivíl no komunidade, atubele ajuda habelar liután informasaun ba populasaun sira atu ko’alia sai, nune’e bele redus estigma diskriminasaun atubele koopera ho fasilidade saúde hetan tratamentu.

Dadus nasionál kona-ba kazu HIV/AIDS ne’ebé fó-sai hosi Ministériu Saúde, katak hosi 2003 to’o juñu 2021 rejista 1.408.

Hosi númeru ne’e iha na’in-600 tama ona iha tratamentu, maibé hosi totál dadus ne’e, iha na’in 200-resin mate, no na’in 400-resin la koopera ho fasilidade saúde atu hetan tratamentu, nune’e bele sai risku ema hotu nia vida, presiza halo diseminasaun nafatin.

Sekretária Rejionál ba Asuntu Saúde, Manuela da Costa, agradese ba parséru sira-ne’ebé desimina ona informasaun nune’e  konsiensializa sidadaun hotu prevene-an hosi impaktu moras HIV/AIDS.

“Numeru afetadu kada tinan aumenta, atu redus kazu ne’e papél ita hotu nian la’os instituisaun públiku sira de’it, entaun presiza halo diseminasaun ba komunidade, iha tinan ne’e Oé-Cusse rejista ualu (8), kompara tinan kotuk menus,” nia fó-sai.

Nune’e papél Autoridade RAEOA iha polítika oinsá redus entaun tenke hamutuk ho parseriu sira halo diseminasaun ba komunidade atu komprende impaktu hosi moras ne’es.

Jornalista       :Abílio Elo Nini
Editór             :Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here