Ministru Trasporte no Komunikasaun, José Agostinho da Silva, entrega sertifíkadu rejistrasaun ba Diretór Ezekutivu operadór telekomunkasaun CESLINK,S.A, Cergio Campus dos Santos. Iha salaun MTK, tersa (16/11). Imajen Tatoli/Francisco Sony

DILI, 16 novembru 2021 (TATOLI)- Ministériu Transporte no Komunikasaun (MTK) liuhosi Autoridade Nasionál Komunikasaun (ANC, sigla Portugés), atribui sertifikadu rejistu ba empreza Ceslink SA.  

Atribuisaun sertifikadu rejistu ba Ceslink tanba kumpre ona rekezitu tuir dekretu-lei númeru 15/2012, artigu 30, katak empreza tenke halo rejistrasaun, iha estatutu, kapasidade administrasaun, tékniku no finaseiru.

“Ita foin atribui sertifikadu rejistrasaun ba empreza Ceslink SA tanba kompleta ona rekezitu ne’ebé hakerek iha artigu 30, Dekretu-Lei númeru 15/2012,” Prezidente Autoridade Nasionál Komunikasaun (ANC, sigla Portugés), João Olivio Freita, hateten ba jornalista sira hafoin ramata seremonia atribuisaun serfikadu, iha salaun MTK.

Prezidente Autoridade Nasionál Komunikasaun (ANC-Sigla Portugés), João Olívio Freitas. Imajen Tatoli/Francisco Sony

Prezidente ANC ne’e esplika, hafoin simu sertifikdu rejistu ne’e, Ceslink presiza kompleta tan rekezitu sira hanesan spectrum radiu frekuensia, simcard no númeru telemovél atu hahú halo investimentu iha setór telekomunikasaun iha Timor-Leste.

“Bainhira, sira kumpre hotu ona rekezitu maka ita foin atribui sertifikadu lisensa ba operadór, atubele livre ona halo operasaun,” Prezidente ANC ne’e akresenta.

Iha biban hanesan, Ministru Transporte no Komunikasaun, José Agostinho da Silva, reforsa, ANC atribui sertifikadu ba empreza Ceslink SA tuir prosesu  legál.

“ANC atribui sertifikadu ne’e tanba Ceslink kumpre ona rekezitu tuir lei haruka,” Governante ne’e akresenta.

Entretantu, Diretór Ezekutiva empreza Ceslink SA, Sergio Campos dos Santos, kongratula Governu liuliu MTK ho ANC tanba bele atribui ona sertifikadu rejistu.

“Ami sente kontente no orgullu tanba hakat ona pasu ida ba atribuisaun sertifikadu rejistu. Nune’e ba oin ami esforsu atu kompleta rekezitu sira seluk,” nia kompromete.

Daudaun, Ceslink iha hela fase prepasaun ba estabelese operadór telekomunikasaun iha Timor-Leste no kompromete sei lansa iha tinan oin.

Diretór Ezekutivu operadór telekomunkasaun CESLINK,S.A, Cergio Campus dos Santos. Imajen Tatoli/Francisco Sony

“Ami nia edifísiu iha Delta, ne’ebé daudaun iha fase preparasaun instalasaun torre no ekipamentu sira ne’ebé order hosi Estadu Unidu Amérika no Xina,” nia afirma.

Kona-ba rekursu umanu, Sergio Campos dehan plau atu halo rekrutamentu ba  timoroan sira pur volta 300.

“Ami sei garantia hodi oferese rede ne’ebé diak ba ita nian komunikadade sira tanba investór timoroan rasik,” nia konklui.

Jornalista : Natalino Costa

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here