Tenente Koronel Infantaria, Domingos da Costa Santos ‘Domin’. Imajen/Mídia F-FDTL

DILI, 13 novembru 2021 (TATOLI)Tenente Koronel Infantaria, Domingos da Costa Santos ‘Domin’, hakotu iis iha tuku 10:23, sábadu ne’e, iha Hospital Nacional Guido Valadares (HNGV) tanba sofre moras komplikadu.

“Nia (matebian) uluk halo tratamentu iha Portugal tanba moras fuan, tensaun, no iis boot, entaun foin daudaun ita infreta hela situasaun COVID-19, entaun nia ladún fó atensaun ba saúde, halo moras ne’e mai fali to’o ohin nia hakotu iis iha ICU Hospital Nasionál Guido Valadares,” Xefe Gabinete Forsa 2020 FALINTIL-Forsa Defeza Timor-Leste (F-FDTL), Kapitaun Mar de Guerra, Higinio das Neves, informa iha HNGV, Bidau, sábadu ne’e.

Tuir Kapitaun Mar de Guerra, matebian halo ona tratamentu ba nia moras durante fulan-ida resin.

“Matebian enfreta moras kuaze fulan-ida semana rua, fofoun moras, nia iis la normál, entaun ami-nia Médiku Militár, Kapitaun Mendes, akompaña nia iha Hospitál Nasionál hodi halo swab, ne’ebé hatudu rezultadu pozitivu COVID-19, nune’e Doutor sira lori ba iha izolamentu Lahane,” nia haktuir.

Nune’e, bainhira to’o Lahanene, matebian kondisaun di’ak, maibé semana ida ho balun matebian nia kondisaun grave no Doutór sira troka malu fó tratamentu, maibé situasaun aumenta grave liután no Doutor sira tau ventiladór.

Kapitaun Mar de Guerra, esplika, molok Doutór sira tau ventiladór ba matebian, nia ko’alia ho Vise Xefe Estadu Maiór Jenerál, Falur Rate Laek, hodi relata nia kondisaun, nune’e Vise Xefe Estadu Maiór tenta no halo esforsu oioin hodi evakua Tenente Koronel ba halo tratamentu iha Singapura no Indonézia, maibé ospitál rai rua la simu tanba hanesan pasiente pozitivu COVID-19 no seidauk simu vasina.

“Entaun família no ha’u rasik semana rua liubá deside transfere nia hosi izolamentu Lahene mai iha ICU Hospitál Nasionál, ne’ebé to’o ohin nia hakotu iis,” nia akresenta.

Xefe Gabinete Forsa 2020 F-FDTL triste tanba lakon nia belun di’ak ida, ne’ebé durante ne’e ativu hanesan Militár.

“Triste boot tanba ha’u lakon ema ne’ebé loron-loron la’o ho ha’u iha tempu difísil no ami nunka husik malu, maibé tanba de’it Corona, ha’u labele kaer nia lima, ha’u só haree de’it hosi dook,” Kapitaun Mar de Guerra konta tuir.

Tanente Koronel Domingos da Costa dos Santos ‘Domin’ moris iha Lospalos iha loron 01 janeiru 1965 no tama iha institusaun F-FDTL  iha tinan 2001.

Matebian hakotu iis hafoin halo tratamentu intensivu iha ICU HNGV.

Durante karreira hanesan Militár, matebian mós hala’o knaar hanesan Adidu Militár iha Portugal no daudaun ne’e halo knaar iha Kuartel Jenerál Komandu F-FDTL, Fatuhada, Dili.

Daudaun ne’e, mate-isin iha hela uma rezidénsia Luro Mata no sei hein seremónia funerál.

Jornalista : Natalino Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here