Jornalista Max Stahl (hatais kalsa badak) ho nia kamera leno hela ba alvu. Imajen/Facebook: Kristy Sword Gusmão

COVALIMA, 12 novembru 2021 (TATOLI)–Padre Vigariu Paróquia Suai, Juvito Mendonça hateten saudozu Max Stahl ho talentu ne’ebè simples hodi filma Masakre Santa Crúz ne’e halo mundu nia matan nakloke ba violasaun direitu umanu ne’ebé akontese iha Timor-Leste.

Notísia Relevante: Max Stahl luta ba umanidade: “In Cold Blood: The Massacre of East Timor”

“Ita aprende buat balun hosi Saudoza Max Stahl ho nia talentu ne’ebè simples sai fotógrafu no kamera man hodi filma Masakre 12 Novembru 1991, talentu iha ema-nia matan folin laek maibé nia dezelvolve talentu ida-ne’e halo mundu nia matan nakloke hodi hamatan ba problema Timor-Leste nian liu-liu kona-ba violasaun direitu umanu,” Padre Juvito Mendonça hateteten liuhosi nia omilia bainhara prezide misa hodi selebra masakre 12 Novembru 1991, iha Igreja Ave Maria Suai, sesta ne’e. 

Jornalista Max Stahl (hatais kalsa badak) ho nia kamera leno hela ba alvu. Imajen/Facebook: Kristy Sword Gusmão.

Saudozu Max Stahl nia servisu halo dokumentasaun ba akontesimentu masakre 12 Novembru maibe nia lori Timor ba mundu liuhosi nia talentu produs filme “In Cold Blood: The Massacre of East Timor” hodi halekar ba mundu, katak buat ne’ebè mak simples no folin laek iha ema seluk nia matan ne’ebé extraordinária. 

“Joven sira, buat simples ita-nia latentu sira-ne’e sai éroi iha mundu modernu ni’an, tenke inspira ema seluk nia talent. Ida-ne’e bele sai éroi ba ita-nia rai rasik hodi kontribui ita-nia talentu ne’ebè Maromak fó mai ita. Saudozu Max Stahl rai hela mensajen ida-ne’e mai ita,” nia dehan.

Max Stahl nu’udar produtór filme hahú hosi rezisténsia juventude loriku asswa’in iha 1991 ne’ebé prega ho naran Masakre 12 Novembru no kontinua ba 1999, povu Timor-Leste koñese saudozu Max Stahl ne’ebé dedika an ba apoiu luta Timor-Leste nian to’o hetan ukun rasik an.

saudozo Max Stahl hosi nia moris, kauza hosi kankru ne’ebé infiltra iha kakorok, susar dada iis ikus hakotu nia peregrinasaun iha Hospital Brisbane Austrália.

Joven tenke kontribui ba pás-estabilidade

Iha biban ne’e, nia husu ba joven sira tenke kontribui ba pás no estabilidade iha Timor-Leste tanba rai-luulik Timor-Leste hola parte iha ema hou-hou nia responsabilidade.

“Ha’u-nia maluk juventude hotu. Rai ida-ne’e hola parte ita hotu nia responsabilidade, ita mak kontinuadór. Ha’u hamriik iha ne’ebé la’o ba ne’ebé, ha’u sempre hanoin responsabilidade rai ida-ne’e iha ha’u-nia liman. Tenke husu ba an rasik, bele fo sai ida ba rai ida-ne’e. Tanba ne’e, ha’u husu ba joven sira, hanesan pelu menus kontribui mós ba pás no estabilidade, ida-ne’e mós buat kiik maibe nia folin boot tebes,” Nai Lulik ne’e hateten.

Padre Juvito apela ba joven sira atu labele hafuhu malu hosi grupu ida ba grupu seluk hodi tuda malu no oho malu nafatin, tempu atu hakanek malu liu ona tanba inimigu laiha ona iha Timor-Leste no imi joven sira mesak timor-oan de’it. 

Bainhira joven sira-ne’ebé mak iha talentu atu hariku rai ida-ne’e maibe la’ós talentu “Mutrabu” ne’ebè atu estraga malu hodi kria instabilidade iha Timor-Leste. 

“Tau iha imi-nia hanoin, rai ida-nia futuru responsabilidade iha imi-nia liman. Labele dehan, ami, sira, ita, ha’u fó saida ba rai ida-ne’e, tanba dezenvolvimentu bele la’o liuhosi kapasidade no matenek,” nia dehan.

Tinan tinan sempre selebra masakre 12 Novembru 1991, bainhara la muda atitude signifika laiha folin. Estudante sira, nia dehan, iha ona hanoin saida mak atu halo no prepara ba sira-nia future no rai Timor-Leste nia future. 

Prezidente 12 Novembru Munisípiu Covalima, Júlio Moniz Bobo dehan, tinan oin juventude Loriku Asswa’in hamutuk ho Centru juventude Covalima sei buka jovens sira atu transforma sira nia mentalidade 

“Joven sira Covalima, ita la’o hamutuk ho juventude loriku Asawa’in atu transforma juventude Covalima sira-nia mentalidade ne’ebé ladun di’ak,” nia hateten. 

Tanba ne’e, nia dehan, joven ne’ebé atu sai di’ak tenke kapasita sira-nia an nu’udar timor-oan hodi prepara no investe ba future. 

Hafoin misa, sobrevivente 12 Novembro, Komandatente PNTL Munisípiu Covalima Hamutuk ho joven sira no sarani sira iha munisípiu Covalima la’o ain hosi Igreja Ave Maria Suai hodi tau aí-funan no sunu lilin iha Monumentu Masakre Setembru Negro 1999. 

Jornalista : Celestina Teles

Editór      : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here