Asistente Adjunta Ministru Defeza EUA ba Ázia Súl no Sudeste Aziátiku, Lindsey W. Ford no Enkaregadu Negósiu Embaixada EUA iha Timor-Leste, Tom Daley, ofisialmente entrega ekipamentu adisionál kombate Covid-19 ba Ministra Saúde, Odete Maria Freitas Belo no Diretór Ezekutivu Servisu Autonomu Medikamentu no Ekipamentu Saúde (SAMES), Santana Martins. Iha armajen SAMES, kinta (11/11). Imajen Tatoli/Francisco Sony

DILI, 11 novembru 2021 (TATOLI)— Estadu Unidu Amérika (EUA) apoia ekipamentu protesaun pesoál COVID-19 hamutuk kaixa 45 ba Ministériu Saúde.

“Forsa Amérikanu apoia ita ho ekipamentu protesaun pesoál COVID-19 nian hamutuk kaixa 45, hafoin item balun sei mai tan tanba sasan ne’e hanesan máskara no luvas sira,’’ Ministra Saúde, Odete Maria Freitas Belo ba jornalista sira bainhira ramata seromnia entrega iha SAMES, Kampu -Alor, kinta ne’e.

Governante ne’e dehan, ekipamentu hirak ne’e sei distribui ba munisípiu sira, no instituisaun sira ne’ebé presiza maskara no luvas.

Iha fatin hanesan, Vise sekretária Ministru Defeza EUA ba Ázia Súl no Sudeste Aziátiku, Lindsey W. Ford hateten,ekipamentu protesaun pesoál  ne’e ajuda Timor-Leste atu  prevene pandemia no halo mitigasaun ba ema no sosiedade sira.

EUA serbisu hamutuk ho Governu Timor-Leste dezde inísiu pandemia hodi fornese vasina Pfizer doze 100,620 ne’ebé besik millaun $5,9 iha asisténsia krítiku hodi kombate COVID-19.

Nune’e mós apoia fundu millaun $2,3 hosi Komandu Indo-Pasífiku EUA  liuhosi USAID atu harii fasilidade izolamentu iha Baucau,  harii unidade kuidadu móvel iha Dili, no hadiak fornesimentu bee no saneamentu iha sentru kuarentena iha Batugade.

Notisia Relevante: Vasina Pfizer doze 100.620 hosi EUA to’o iha Dili

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here