Diretora Nasionál Empregu Interior, SEFOPE, Clementina de Araujo Almeida. imajen/Natalino Costa

DILI, 10 novembru 2021 (TATOLI)– Governu liuhosi Sekretáriu Estadu Formasaun Profisionál no Empregu (SEFOPE), kontinua hatudu kompromisu polítika hodi mellora sentru formasaun sira atu kapasita  joven-sira atu asesu ba kampu traballu iha rai-laran no dispora.

Oitavu Governu prioritiza polítika formasaun no auto-empregu atu kontinua mellora sentru formasaun sira hodi fó kapasitasaun ba joven-sira hodi hamenus taxa dezempregu iha Timor-Leste.  

“Ita iha sentru formasaun kuaze 16 ne’ebé akreditadu no hetan mós apoia hosi SEFOPE, atu kapasita ita nian joven sira. asesu ba empregu,” Diretora Nasionál Empregu Interior, SEFOPE, Clementina de Araujo Almeida, hateten ba Agência TATOLI iha nia knaar fatin, Caicoli, kuarta ne’e.

SEFOPE mós iha polítika atu kontinua akompaña no finansia joven-sira ne’ebé ramata ona formasaun no iha abilidade atu kria kampu traballu rasik.

“Ita husu joven-sira ne’ebé remata ona formasaun liuhosi programa auto-empregu atubele kria kampu traballu ba sira nia aan rasik hanesan loke ofisina, rentál no seluk tan,” nia akresenta.

Hosi programa auto-empregu ne’e kuaze joven 15% maka susesu ona hodi fó empregu ba timor-oan seluk.

Tuir dadus joven sira ne’ebé rejistu hakarak asesu ba ba formasaun profisionál hahú 2015 to’o 2021, hamutuk 63.493, kompostu hosi mane 36.369 no feto 27.122.

Hosi totál ne’e, SEFOPE rejista joven-sira ne’ebé konsege hetan serbisu hamutuk 623, kompostu hosi mane 372 no feto 251.

Traballadór ba Korea Súl no Austrália

Nune’e, Diretór Nasionál Empregu Exterior,SEFOPE, Filomeno Soares, informa mós politíka SEFOPE haruka traballadór timor-oan sira ba servisu iha  Austrália no Korea súl  atu  reduz taxa dezempregu iha Timor-Leste.

Atu redús dezempregu iha Timor-Leste, SEFOPE kontinua prioritiza no hametin kooperasaun ho Governu Austrália no Korea súl atu haruka joven-sira ba serbisu. rai liur hanesan Korea súl no Austrália

Hahú tinan 2009 to’o 2021, Governu Timor-Leste haruka ona joven bá  iha Korea Súl hamutuk 3.819 ne’ebé serbisu iha  área peska, fábrika no agrikultura.

“Ami nian dadus persentazen joven-sira timoroan ne’ebé maka serbisu iha Korea Súl  hanesan mane 75% no feto porsentu 25%”,hateten Filomeno Soares.

SEFOPE iha kompromisu atu kontinua fó kapasitasaun di’ak ba joven sira atu bele asesu ba kampu traballu iha rai-laran no rai li’ur.

Ho polítika redus taxa dezempregu, daudaun SEFOPE prepara timoroan hamutuk 1.000 resin atu ba serbisu iha rai Korea Súl no Austrália.

“Ami halo ona prepara ema 500, ne’ebé hein kontratu mai sira  ba ona, maibé tanba COVID-19 mak sei afeta,” nia akresenta.

Timoroan sira ne’ebé serbisu iha Asutrália no Korea Súl konsege hamoris direta família nia vida, maski sediauk hatama reseita ba Estadu..

Alende, SEFOPE mós halo ona prepara liuhois kapasitasaun téknika no ligua ba timoroan hamutuk 14.742 hosi munisípiu 12 inklui Rejiaun Administrativu Espesiál Oé-Cusse no Ambeno atu ba servisu iha Austrália.

Iha 2012, Governu Timor-Leste no Austrália selebra akordu Seasonal Working Programme (SWP) no Pacific Labour Scheme (PLS) ho diransaun kontratu serbisu masímu tinan ida.

Totál traballadór timor-oan ne’ebé Governu haruka ba iha Austrália hahú tinan 2012 to’o 2021 hamutuk  5.047, kompostu hosi mane nain-3.635 no feto hamutuk 1.412.

Iha 2012 haruka kedan traballadór sira iha área ospitalidade no ortikultura nain-hitu, 2013 haruka tan nain-35, na’in-131 iha 2014, na’in 161 iha 2015, iha 2016 nain-298, iha tinan 2017 nain-782. Iha tinan 2018 haruka traballadór nain-1.426, 2019 tan nain-1.698, 2020 nain-485 no 2021 haruka nain-19.

Hahú  tinan 2019 to’o 2020, SEFOPE haruka tan trabaladór ba programa Pacific Labour Scheme (PLS) na’in-81, kompostu mane 63 no feto 18.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here