Juventude Munisípiu Baucau realiza atividade marsa ba dame hodi selebra loron masakre Santa Kruz 12 Novembru. Imajen espesiál

BAUCAU, 11 novembru 2021 (TATOLI) – Juventude Munisípiu Baucau realiza atividade marsa ba dame hosi Tirilolo, vila nova ba suku Samalari, postu administrativu Baucau vila ho distánsia kilómetru 28 hodi selebra loron masakre Santa Kruz 12 Novembru.

Koordenadór Komisaun Organizadora 12 Novembru, João Ximenes, hateten, objetivu hosi atividade refere atu juventude munisípiu Baucau fó onra no valoriza ba joventude loriku as’wain sira-ne’ebé mate iha Santa Kruz tinan 30 ba kotuk.

Atividade sira hanesan marsa ba dame, kalan reflesaun, aprezentasaun teatru 12 Novembru, hasa’e bandeira, sunu-lilin iha monumentu memoriál saudozu David Alex Dai Tula, inklui halo kampaña vasinasaun ba populasaun sira-ne’ebé seidauk simu vasina AstraZeneca.

“Atividade ne’e ita halo hodi fó hanoin hikas ka relembra hikas fali ita-nia as’wain sira-ne’ebé mate iha Santa Kruz no as’wain sira seluk ne’ebé fó hirus-matan funu hasoru tropa Indonézia to’o ita hetan ukun rasik-an,” Koordenadór Komisaun Organizadora, ko’alia Sentru Juventude Baucau, Vila Nova, kinta ne’e.

Razaun realiza atividade refere iha suku Samalari tanba hakarak hatudu fatin istóriku hanesan kaixa klandestina Inglatera no fatin subar Komandante Sub Xefe Estadu Maiór FALINTIL, David Alex ‘Dai Tula’ ba joven sira nune’e kontinua lembra as’wain sira-nia luta hasoru inimigu Indonézia.

Xefe Sentru Saúde Uailili, Adelino Moreira do Espírito, hateten, envolve direita iha aatividade refere atu kontinua sosializa no halao vasinasaun ba populasaun sira-ne’ebé seiduak simu vasinasaun.

Joventude sira-ne’ebé partisipa iha atividade refere komposta hosi Teatru Filteda Baucau, Kruz Vermella Timor-Leste (CVTL, sigla Portugés) filiál Baucau, Sentru Nasionál Juventude Timor-Leste (CNJTL, sigla Portugés).

Nune’e mós Sentru Treinamentu Unidade Feto ba Dezenvolvementu (UFD), Alumi no Membru Parlamentu Foinsa’e Baucau no pesoál saúde hosi sentru saúde Uailili.

Jornalista         : Natalino Belo.

Editór               : Evaristo Martins Soares

PUBLISIDADEiklan

HAKEREK NO HATÁN

Please enter your comment!
Please enter your name here