Jerente klube Aitana, Vicente João da Costa Xavier. imajen/ LFTL

DILI, 11 novembru 2021 (TATOLI) – Kalendáriu liga Futeból Timor-Leste Primeira Divizaun fiksa ona atu hala’o abertura iha loron 12 novembru, tuku 16:00, lokraik. Abertura ne’ebé hala’o iha Estádiu Munisipál Dili sei aprezenta hosi klube Aitana FC no Karketu Dili FC.

“Aitana nia jogadór prontu atu bele joga iha primeiru divizaun ho ami nia tarjetu tenke save pontu tolu (manán),” dehan Jerente klube Aitana, Vicente João da Costa Xavier, hateten liuhosi konferensia imprensa iha edifisiu LFTL, Formosa-Dili, kinta ne’e.

Klube Aitana mós prepara ona jogadór estranjeiru na’in-haat atu reforsa iha jogu abertura, maibé aban na’in-rua hanesan hosi Gaña no Papua Indonézia mak sei joga tanba na’in-rua seluk sei iha hela estranjeiru no tempu besik mai Timór.

Alende ne’e, jogadór lokál ne’ebé Aitana impresta hosi Boavista FC Timor na’in haat, hanesan, Edit Savio, Fransyatma Kefy, João Paulo no Rivaldo.

“Ho prejensa jogadór hirak ne’e Aitana iha konfiansa makas atu manán jogu ne’ebé hala’o aban,” nia garante.

Treinadór Karketu Dili FC Vicente Ramos, akompana ho Sekretariu Jeral. imajen/ LFTL

Iha biban hanesan, Treinadór Karketu Dili FC Vicente Ramos, hateten, ekipa preparadu hodi kompete iha jogu abertura kontra FC Aitana no sei hatudu jogu ne’ebé diferente.preparasaun Karketu nian durante ne’e lao masimu no tarjetu tenke manan jogu ne’e.

“Ami nia preparasaun la’o di’ak no jogador sira mós preperadu atu kontra FC aitana no ami hakarak halo supreza ba adeptu sira,” Treinadór ne’e afirma.

Daudaun ne’e, Karketu rejista ona jogadór na’in 27 iha LFTL ho trajetu atu hadau pontu tolu hosi Aitana FC.

Mudansa oráriu iha jogu primeiru divizaun

Entertantu, Diretór Verifikasaun no Lisensa LFTL, José Carvalho, hateten, antes ne’e mosu difikuldade uitoan hela ba kalendáriu jogu entre ekipa Primeira Divizaun rua AD SLB Laulara no DIT FC iha sira nia primeira jogu tanba maioria jogadór SLB na’in-13 tama iha selesaun nasionál ne’ebé daudaun prepara hela iha atu ba kompete  iha jogu Suzuki Cup, fulan-dezembru ne’e.

Oráriu jogu Primeira Divizasaun LFTL. Imajen/espesiál

“Tuir regulamentu AFC no FIFA nian bainhira jogadór klube balun nian ba partisipa selesaun tenke halo mudansa oráriu ba jogu klube nian. Nune’e ami bolu ona DIT ho SLB atu ko’alia muda jogu iha sabadu 13/11, ba fali 23/11 semana oin, ne’ebé klube rua ne’e mós konkorda ona,” nia akresenta.

Klube ne’ebé partisipa iha jogu primeira divizaun hamutuk hitu, hanesan, AD SLB, AS Ponta Leste, DIT FC, Karketu Dili FC, Aitana FC, Lalenok United FC no Assalam FC.

Daudaun ne’e, klube hitu ne’e submete hotu ona dokumentu no lista jogadór ba orgaun liga no kada klube iha direitu hatama jogadór na’in 27.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here