Tabele Klasifiaksaun provizoriu Liga Futebol Timor-Leste. Imajen/espesial

DILI, 10 novembru 2021 (TATOLI)– Ekipa Academica FC no Atletico Ultramar lidera provizóriu tabela klasifikasaun ho pontu 10, iha segunda divizaun jogu Liga Futeból Timor-Leste époka 2021.

Iha grupu A lidera hosi Academica FC ho pontu 10 ne’ebé rekolla hosi jogu hamutuk da-haat, kompostu hosi manán dala-tolu no empate ida, FC Portu Taibesi ho pontu hitu hosi jogu dala tolu, hanesan manán dala-rua no empate dala-ida, Zebra FC ho pontu haat, ne’ebé rekolla hosi jogu dala-haat, kompostu hosi manán dala-ida, empate dala-ida no derrota dala-rua. AS Marca ho pontu tolu ne’ebe hetan hosi jogu dala-haat, hanesan manán dala-ida, no lakon dala-tolu no Fitun Estudante ho pontu ida, hosi jogu dala-tolu, hanesan empate dala-ida no lakon dala-rua.

Entratantu, Grupu B lidera provizóriu hosi Atletico Ultramar ho Pontu 10 ne’ebé rekolla hosi jogu dala-haat, Emmanuel FC ho pontu sia, Santa Cruz FC ho pontu neen, Nagarjo FC ho pontu haat, Lica-Lica Lemorai ho pontu tolu no ikus liu mak Kablaki FC ho pontu ida.

Nune’e, Academica FC termina ona nia jornada jogu ne’ebé tuur metin ona iha zona modok hodi hein tikete atu utrapasa ba Primeira Divizaun. Tuir fali FC Porto Taibessi seidauk kompleta nia jornada tanba foin joga dala-tolu, nune’e sei hela jogu ida kontra FIEL atu tama iha faze segundu atu hakat ba Primeira Divizaun.

Ba klube tolu seluk laiha ona kbiit atu utrapasa ba Primeira Divizaun tanba pontu la to’o hanesan, Zebra hela de’it ho pontu haat, Marca hela de’it ho pontu tolu no FIEL hela de’it ho pontu ida.

Nune’e mós, iha Grupu B, lidera hosi Atletico Ultramar ho pontu 10, tuir kedan Emanuel FC ho pontu sia, maibé seidauk seguru tanba ekipa ne’e sei falta jogu ida.

Ekipa tolu seluk hanesan, Nagardjo FC daudaun ho pontu haat jogu ikus kontra Kablaki nia manán mós sei laiha ona oportunidade hakat ba Primeira Divizaun, Kablaki mós laiha ona oportunidade tanba pontu hela de’it ida, Lica-lica hela de’it ho pontu tolu.

Époka ne’e klube haat hosi Segunda Divizaun mak sa’e ba Primeira Divizaun hodi kompleta klube 10, enkuantu Primeira Divizaun Boavista FC Timor degrada ona ba Segunda Divizaun nune’e hela de’it klube hitu mak iha Primeira Divizaun.

Ekipa-sira futeból ne’ebé iha ona Primeiru Divizaun hanesan, AD SLB Laulara, Aitana FC, DIT FC, Karketu Dili FC, Lalenok United FC, AS Ponta Leste no Assalam FC.

Tuir oráriu, abertura Liga Futeból Timor-Leste Primeiru Divizaun hahú 12 novembru to’o Dezembru tinan ne’e.

Notísia Relevante: Manán 3-1, Academica FC utrapasa ba Primeira Divizaun

Jornalista : Hortencio Sanchez

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here