OÉ-CUSSE, 09 novembru 2021 (TATOLI) — Sekretáriu Estadu Juventude no Desportu (SEJD), Abrão ‘Nokosiku’ Saldanha, segunda ne’e enkontru kortéjia ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano hodi diskute kooperasaun modalidade desportiva komunitária no eskolár.
“Ami koordena atividade desportu ho autoridade RAEOA, tanba tuir vizaun desportu hakarak hahú hosi baze, entaun hahú hosi joven sira iha nível suku ho eskola sira, tanba ne’e mak ohin ita deskuti kooperasaun atu sub-rejiaun sira bele organiza realiza desportu iha suku, aldeia no bairru, nune’e mós iha eskola hotu-hotu atu hahú prátika desportu,” Sekretáriu Estadu Juventude no Desportu (SEJD), Abrão ‘Nokosiku’ Saldanha, informa ba Agência Tatoli, iha Oe-Cusse, tersa ne’e.
Prezidente Autoridade RAEOA Arsénio Paixão Bano, agradese ba kooperasaun ne’e atu promove joven sira ba desportu, nune’e autoridade garante iha tempu badak sei realiza torneiu komunitária no eskolár iha rejiaun Oé-Cusse.
“Kooperasaun ne’e importante atu realiza iha Oé-Cusse, hodi hasa’e talentu juventude sira kona-ba desportivu nian, iha nível rejiaun, nune’e iha futuru bele partispa iha eventu nasionál no internasionál bele hatudu prestasaun di’ak no kualidade,” Prezidente Autoridade RAEOA Arsénio Paixão Bano akresenta.
Jornalista : Abílio Elo Nini
Editór : Evaristo Soares Martins
