Atividade perfurasaun iha posu Feto Kmaus iha Covalima, halo mina-teen suli tuir baleta no nalihun iha populasaun nia to’os laran. Imajen TATOLI/Celestina Teles

COVALIMA, 09 novembru 2021 (TATOLI)—Mina-teen hosi perfurasaun mina posu Feto Kmaus Covalima fó ameasa ba to’os-na’in sira-ne’ebè halo to’os besik iha área perfurasaun, maske antes ne’e Governu atribui ona lisensa ambientál ba empreza Timor Resources hamutuk ho Timor GAP hodi halo perfurasaun mina-matan iha rai-maran Kosta Súl. 

Notísia Relevante: Governu atribui lisensa ambientál ba Timor Resources fura mina-matan

“Ami halo to’os besik perfurasaun mina posu Feto Kmaus no mina-teen agora sulin ona mai nalihun iha ami-nia to’os laran no fó ameasa ba ami atu kuda batar mós la di’ak ona,” Toos-Na’in, Nazaria Madeira, hateten ba jornalista sira iha aldeia Tabakolot, suku Debos, postu administrativu Suai Vila, Covalima, tersa ne’e.  

Nu’udar agrikultora, nia dehan, bainhira halo to’os sempre sunu du’ut antes prepara to’os atu kuda batar, tanba agora udan mós monu rai ona no bainhira sunu to’os mak akontese buat ruma atu fó sala ba sé.

“Ita hatene perfurasaun mina-rai ne’e ahi labele besik ho mina-teen ne’ebè sulin ba ami-nia to’os laran halo ami labele ona kuda batar. Iha loron hirak nia laran, ami sente mina iis makaas tebes, halo ita tuur mós la di’ak,” Nazaria informa. 

Ho problema ida-ne’e, nia parte sei buka dalan hodi hasoru kompañia Timor Resources ne’ebè parseria ho Timor Gap halo perfurasaun mina posu Feto Kmaus ne’e. 

Komunidade ida-ne’ebé hela besik iha área perfurasaun mina, Xisto Gusmão, hateten durante loron tolu (3) kompañia Timor Resources ne’ebé halo perfurasau mina posu Feto Kmaus ne’e hetan ona rezultadu no sei fó impaktu ba ambiente no biodiversidade iha tasi laran. 

“Realidade ita haree ona, balleta agora mina-teen nakonu ne’ebè sulin ona ba Mota Karau Ulun. Ita hatene oras ne’e daudaun udan monu rai ona, mina-teen sira lori ba Tasi hodi fó impaktu ba viodibersidade iha tasi laran liu-liu ba komunidade ne’ebè halo to’os iha área Perfurasaun mina posu Feto Kmaus ne’e,” nia dehan.

Maske komuunidade preokupa ba mina-teen ne’ebé sulin tuir balleta hosi rezulatdu perfurasaun mina-matan maibé antes ne’e Country Manager Timor Resources Filomino Andrade informa hafoin Primeiru-Minstru hala’o lansamentu ba perfurasaun mina-matan ne’e to’o agora seidauk hetan rezultadu.  

Notísia Relevante: Timor-Leste marka istória dahuluk halo perfurasaun mina iha rai-maran

Jornalista : Celestina Teles

Editór       : Cancio Ximenes 

PUBLISIDADEiklan

2 KOMENTÁRIU

  1. Ne’e situasaun ida-ne’ebé lamentavel tebes. Será que la iha estudu viabilidade ida antes, liu-liu kona-ba impaktu husi perfurasaun sira, hanesan mós ida-ne’ebé fó-sai daudaun? Tuir ha’u-nia hanoin, Sekretaria Estadu Ambiente tenke tun lalais ba terrenu hodi halo obsevasaun liga ho mina-teen ne’ebebé soe arbiru de’it hanesan ne’e tanba ida-ne’e, aleinde afeta ba atividade halo to’os nian, fó mós impaktu ba bee rai-okos iha área ne’ebá, ne’e keta populasaun konsume karik.
    Ba projetu sira hanesan ne’e, ha’u hanoin fila-fali Amu Papa nia liafuan ida be dehan “Homem no centro”, katak dezenvolvimentu hotu-hotu halo ba ema, tanba ne’e la bele prejudika fali ema.

  2. Agradese tebes ba VIII governo nia planu nbe hakarak atu muda povu nia moris liu husi programa dezenvolvimentu prefurasaun mina iha rai maran, ho ida ne hakarak infirma ba diresaun meu ambiente antes atu fo licensa anbiebte nian ba kompanhia ida tengki halo eatudo ida ba area refere, ou bele muda ses oitoan ita nia komunidade sira ses husi fatin refere atu nune labele prezudika ba sira nia saude, aat liu tan maka nudar moris vida agrikultor ou tos nain sira nia tos nebe besik oin sa atu sunu nia tos se wainhira nia tos beaik iha fatin refere, se mina ten ne tun ba tasi bele estraga mos ita nia biodiversidae sira nebe maka moris iha tasi, apa lagi ema barak moris husi tasi. Ne sujere dt.🙏

HAKEREK NO HATÁN

Please enter your comment!
Please enter your name here