Presidente Interino Frenti Mudansa (FM), Egidio de Jesus. Imajen Tatoli/ Egas Cristovão.

DILI, 09 novembru 2021 (TATOLI)—Prezidente Interinu Partidu Frente Mudansa, Egídio de Jesus, hateten konferénsia partidu nian mak sei deside kandidatu ba Prezidente Repúblika hodi kompete eleisaun prezidensiál 2022.

Frente Mudansa hetan apoiu hosi partidu tolu hanesan PDP, APMT, PLPA sei halo koligasaun ho naran FDDP atu lidera ho konviksaun, tanba ne’e sei iha konferénsia partidu ida-idak nian hodi konkore ba iha eleisaun prezidensiál ne’ebé atu mai.

Notísia Relevante: Prezidente Repúblika sei dekreta kalendáriu eleisaun prezidensiál iha janeiru 2022

“Ami sei halo konferénsia nasionál ida hodi deside kandidatura hosi partidu, tanba ne’e ami iha mehi ona atu konkore iha eleisaun prezidensiál,” Egídio de Jesus hateten hodi responde Agência Tatoli iha Parlamentu Nasionál, tersa ne’e.

Maibé, nia dehan, partidu sei hein Prezidente Repúblika dekreta kalendáriu eleisaun prezidensiál mak hala’o anunsíu kandidatura ba públiku.

Partidu mós halo preparasaun sira iha baze hanesan atividade polítika, sosializasaun no sira seluk ne’ebé preparadu hodi konkretiza iha eleisaun mai no prontu kompete ho kanditatu sira seluk.

Antes ne’e, Prezidente CNE José da Costa Belo hateten, iha lei bainhira PR dekreta ona loron eleisaun mak loron 60 antes eleisaun, tenke realiza ona eleisaun, nune’e tuir kalkula iha fulan janeiru 2022 mak PR sei fó sai no iha marsu tenke halo eleisaun.

Tuir Konstituisaun Repúblika Demokrátika Timor-Leste, artigu 75 (Elejibilidade), iha   alínea 1 hateten, bele tuir kandidatura ba Prezidente Repúblika sidadaun timor-oan sira-ne’ebé iha ilas hotu tuir mai ne’e:

  1. a) Sidadaun nanis,
  2. b) Iha tinan mínimu 35,
  3. c) Ho kapasidade di’ak
  4. d) Ne’ebé hetan proposta hosi sidadaun hili-na’in mínimu nain rihun lima (5000).

Iha alínea 2 haktuir, Prezidente Repúblika kaer mandatu to’o tinan lima nia laran no ninia knaar ramata bainhira Prezidente foun simu pose.

Iha alínea 3 hateten, Prezidente Repúblika nia mandatu bele hetan renovasaun dala-ida de’it.

“Iha artigu 75 ne’e kandidatu sira tenke kumpre tuir,” nia dehan.

Kona-ba preparasaun ba eleisaun prezidensiál, nia hateten, CNE hamutuk ho orgaun eleitorál Sekretáriadu Tékniku Administrasaun Eleitorál (STAE) halo preparsaun hodi hala’o hela resensiamentu eleitorál iha nivél nasionál no territóriu tomak to’o iha postu ne’ebé daudaun ne’e la’o hela.

Aliénde ne’e, preparasaun ne’e halo mós iha diáspora ne’ebé ekipa konjuntu kompostu hosi CNE, STAE, Ministériu Justisa (MJ) ho Ministéiru Negósiu Estranjeiru (MNEK) dezloka no halo resensiamentu eleitorál iha Portugal, Korea, Reinu Unidu no iha Austrália hodi atende sidadaun timor-oan sira atu ezerse sira-nia dreitu votu.

Entretantu, CNE halo mós edukasaun sívika iha munisípiu hotu, foku ba oinsá partisipasaun eleitór sira atu partisipa iha eleisaun no introdús matéria sira kona-ba sidadaun sira kada tinan lima partisipa eleisaun. 

Edukasaun sívika ne’e, fó sensibilizasaun ba komunidade kona-ba partidu polítiku hira mak sei partisipa no kandidatu PR sira-nia prosesu aprezentasaun la’o oinsá, hafoin Prezidente Repúblika atu dekreta kalendáriu eleisaun, nune’e sidadaun sira fó votu liuhosi eleisaun demokrátika.

“Matéria prinsipál ne’ebé ita esplika iha edukasaun sivíka mak oinsá bele partisipa no fó kontribuisaun ba nasaun, tanba nasaun demokrátika periodikamente eleisaun akontese kada tinan lima,” nia subiña.

CNE hanesan orgaun eleitorál nia servisu mak halo preparasaun liuhosi meiu hotu-hotu iha siklu eleitorál ba preparasaun iha tempu eleisaun no hafoin eleisaun.

CNE nia papél importante mak halo supervizaun ba aktu eleitorál hotu-hotu, nune’e preparasaun la’o hela no preparadu bainhira Prezidente Repúblika dekreta ona kalendáriu eleisaun.

Antes ne’e, Diretór Jerál STAE, Acilino Branco, afirma iha eleisaun mai identifika ona aumenta sentru votasaun hamutuk 1200 no estasaun votu iha 1.500 iha territóriu tomak.

Tuir baze dadus STAE nian, antes ne’e iha territóriu rejista eleitór hamutuk 846.352, maibé ho resensiamentu eleitorál atualizasaun dadus to’o iha fulan julu tinan ne’e, rejista tan eleitór foun 5,124.

Notísia Relevante: PR dekreta kalendáriu eleisaun, kandidatu bele aprezenta kandidatura ba TR

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here