Armajen SAMES rejionál Baucau. Imajen TATOLI/Natalino Belo

DILI, 8 novembru 2021 (TATOLI)— Servisu Autónomu Medikamentu no Ekpamentus Saúde (SAMES) prevee $8,985,500 hodi finansia programa rua, sub-programa haat no atividade ualu iha Orsamentu Jerál Estadu (OJE) 2022.

“Orsamentu Jerál Estadu 2022 ita propoin milaun $29, maibé tuir prioridade Estadu no Governu ninian ita konsege hetan de’it $8,985,500. Ita aloka orsamentu 76% ba kompra medikamentu, seluk ne’e ita iha persentajem ki’ik ne’ebé mak aloka ba saláriu no vensimentu ba iha bens no servisu,” Diretór Ezekutivu SAMES, Santana Martins, hateten ba Agência TATOLI iha Parlamentu Nasionál, segunda ne’e.

Totál $8,985,500 fahe ba kategoria saláriu vensimentu $ 608,500, bens no servisu $ 6,880,168, kapitál menór $415.000, kapitál dezenvolvimentu $121,832, no transferensia públika $ 960,000.

Orsamentu ne’e finansia ba programa rua hanesan, Programa ho kódigu 510 kona-ba Governasuan di’ak no jestaun institusionál prevista montante orsamentu $1,146,155 no programa ho kódigu 850 kona-ba saúde prevee  montante 7,839,345.

Iha OJE 2020 ne’e, Diretór ne’e dehan 10% ba trasferensia públika atu transfere ba iha UNICEF no UNFPA atu kompra vasina regulár nomós Comunity planeamentu familiar.

“Durante ne’e mak Ajénsia Internasionál responsabiliza, maibé komprimisiu ne’ebé mak Estadu no Governu foti tenke fazeadamente, tanba ne’e ita aloka 75% atubele kompra Comunity Planeamentu Familiar sira, maibé ita mós nafatin kompra medikamentu no bens konsumu,’’Santana subliña.

Servisu Autonomu Medikamentus Ekipamentus Saúde (SAMES) hanesan servisu publiku hodi responsavel ba produsaun importasaun armazeneamentu no distribuisaun produtu farmaséutiku no ekipamentu saúde ba servisu nasionál saúde iha artigu 5, Dekretu-Lei 18/2015, 24 juñu.

Entretantu iha audénsia publika ne’e SAMES relata mós ezekuasaun Orsamentu  Jerál Estadu 2021 (OJE) ne’ebé atinje ona 58%.

Notísia Relevante: Armazen SAMES importante atu asegura ai-moruk

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here