Rezultadu golu entre Mauputar FC no Boa sorte FC. imajen/LFTL

DILI, 08 novembru 2021 (TATOLI)– Ekipa Mauputar FC susesu iha nia jornada hodi halakon nia adversáriu Boa Sorte FC ho rezultadu 5-2 iha jogu kontinuasaun Pra Liga Futsal Timor- Leste ne’ebé hala’o iha kampu futsal FALINTIL-Forsa Defeza Timor-Leste (F-FDTL) Fatuhada, segunda ne’e.

Ho vitória ne’ebé Mauputar gaña iha jornada 20 ne’e lori ekipa ne’e mantein nia pozisaun iha jona modok ho pontu 48. Iha ne’ebé Mauputar tuur iha pozisaun da-toluk hosi pozisaun primeiru ne’ebé okupa hosi Ramelau FC no segundu Mushila FC.

Enkuantu Boasorte nafatin okupa iha nia pozisaun ho pontu 40, maski iha jona modok, ho rezultadu ne’e halo Boa Sorte tenke servisu makas atu jornada 21 tenke manán ekipa ne’ebé nia sei hasoru.

Hanesan baibain ekipa rua ne’ebé hasoru malu tenke lansa kontra no atake ba malu tuir tékniku no abilidade ida-idak nian liuhosi pasa bola ain ba ain iha kampu laran ho mehi atu hetan vitória.

Kontra no atake ne’ebé ekipa rua ne’e halo, hatudu katak Boa Sorte labele konkista vitoria tanba iha minutu 12 jogadór Mauputar Davidson Lopes loke ona golu primeiru hodi hatur rezultadu ba 1-0, golu ne’e la halo Boa Sorte lakon esperansa nafatin servisu nune’e iha minutu 21 jogadór Reinaldo Alves responde ona golu ida muda rezultadu ba 1-1.

Hosi golu, Mauputar halo esforsu fó duni rezultadu tanba iha minutu 26, Davidson lansa tan golu segundu muda rezultadu ba 2-1.

Golu ne’e halo Boa Sorte sira la hakmatek iha kampo laran, nune’e liu de’it minutu ida iha minute 27 Reinaldo Alves halo golu da-ruak hodi muda eskore ba 2-2.

Maibé golu Boa Sorte nian hela de’it nune’e tanba jogadór Mauputar la fó fatin nune’e iha minute ‘29, ‘32 jogadór Mauputar Ruben Faria halo golu hodi hatur rezultadu nakfilak ba 4-2, laos ne’e de’it tanba oportunidade ne’ebé di’ak iha minutu ikus 39 Nivaldo Mesquita halo golu ikus hodi termina jornada ba ekipa rua ho eskore 5-2.

Ho rezultadu ne’e hatudu katak, Mauputar mak iha direitu absoluta ba hetan pontu tolu, enkuantu Boa Sorte hela de’it ho naran alias zero.

Notisia Relevante: Mauputar  vs M-VDL, Mauputar festa golu

Jornalista : Hortencio Sanchez

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here