Sekretária Estadu Igualdade no Inklusaun, Maria Jose da Fonseca Monteiro de Jesus. Imajen/ Egas Cristovão

DILI, 08 novembru 2021 (TATOLI)—Governu liuhosi Sekretaria Estadu Igualdade no Inkluzaun (SEII), segunda ne’e selebra loron nasionál feto Timor-Leste ba dala-45 ho tema “Feto nia lideransa hodi haforsa demokrasia no kontribui ba dezenvolvimentu inkluzivu”, ne’ebé realiza ho programa prezidénsia aberta.

Notísia Relevante: Feto mak hametin família no garante pás iha Timor-Leste

“Programa prezidénsia aberta iha ámbitu komemorasaun loron nasionál feto Timor-Leste ne’ebé tinan-tinan ita komemora iha loron 03 fulan-novembru no tinan ne’e espesiál tebes tanba aleinde selebrasaun iha nível nasionál iha Palásiu Prezidénsia ne’e iha loron 03 fulan ne’e SEII sai uma na’in hodi selebra iha munisípiu Manufahi,” Sekretária Estadu Igualdade no Inkluzaun (SEII), Maria José da Fonseca Monteiro de Jesus, hateten liuhosi ninia diskursu iha sekuénsia programa prezidénsia aberta loron nasionál feto TimorLeste, iha Palásiu Prezidensiál Nicolau Lobato, Bairru Pite, Dili, segunda ne’e.

Hosi selebrasaun loron nasionál feto Timor-Leste ne’ebé sei hala’o durante loron rua ne’e sei iha mós espozisaun ba produtu sira hosi atividade negósiu grupu feto sira hosi munisípiu 12, inklui Autoridade Rejiaun Administrativa Espesiál Oé-Cusse Ambeno (RAEOA) ne’ebé mak hetan ona fundu hosi programa empoderamentu ekonómiku Sekretaria Estadu ba Igualdade no Inkluzaun no Grupu sira hosi membru Rede Feto Timor-Leste.

“Ohin dadeer Palásiu Prezidensiál nakloke ba maluk feto sira atu halo konsulta médika no sei bele diverte ho konsertu muzikál. Aban mak sei sai momentu importante liu iha programa loron rua nian, momentu ne’ebé itania reprezentante sira sei hasoru direita ho Prezidente Repúblika no sei iha biban atu rona liafuan murak no hato’o mós sirania hanoin no preukupasaun,” nia dehan.

Iha oportunidade ida-ne’e, sei fó apresiasaun ba kreatividade oioin hosi feto sira-nian ne’ebé sira transforma ba negósiu hodi sai fonte rendimentu ba sirania an no reforsa ba sirania família, nune’e timor-oan hatudu solidaridade no apresiasaun liuhosi hola sirania produtu hodi hakbiit maluk feto sira iha área ekonomia.

Hosi ne’e, tinan rua ona mak Prezidente Repúblika, Francisco Guterres Lú Olo, hato’o mensajen ba Nasaun iha loron nasionál feto Timor-Leste no ida-ne’e iha signifikadu aas tebes ba feto hotu iha Timor-Leste.

Prezidente hatudu duni ba Timor katak hanesan aman ba nasaun, Prezidente haree komponente hotu inklui sira-ne’ebé durante ne’e marjinalizadu liu. Prezidente sei asegura katak laiha ema ida ka komponente ida mak la sente palásiu prezidensiál hanesan sira-nia uma no atu hatudu mós katak Prezidente Repúblika hanesan aman ba Nasaun no hanesan mós sira-nia aman.

“Jestu ida katak Prezidente Repúblika hakuak ema hotu no lakohi husik komponente balun iha kotuk ne’ebé sei hatudu mós liuhosi entrega subsídiu ba maluk feto balun,” nia dehan.  

Governante ne’e hateten, tinan ne’e TimorLeste komemora loron nasionál feto TimorLeste ba dala45 no loron importante ne’e hahú komemora iha loron 03 fulan novembru iha tinan 1976, hodi hanoin loron mate eroina saudoza Maria Tapó iha liña oin ho kilat iha liman hodi reziste forsa invazora atu defende dignidade feto nian no direitu povu TimorLeste ba ukun rasik an.

“Loron nasionál iha atu selebra fó onra no rekoñesimentu ba kontribuisaun no knar importante feto nian iha frente oioin iha prosesu luta ba ukun rasik an no mós iha setór oioin iha tempu rai ida-ne’e ukun aan ona. Maske nune’e, loroloron feto barak iha TimorLeste sente nafatin tratamentu diskriminativu, hasoru nafatin violénsia. Hein katak ho komemorasaun ne’e bele asegura TimorLeste sai fatin ba feto hodi goza direitu, dever no oportunidade hanesan,” nia dehan.

Xefe Kaza Sivil Prezidente Repúblika, Francisco Maria Vasconcelos, hateten tema ba selebrasaun tinan ne’e mak feto nia lideransa hodi haforsa demokrasia no kontribui ba dezenvolvimentu inkluzivu.

“Feto nia lideransa, oinsá feto bele hatudu ninia lideransa, dahuluk feto tenke organiza sirania an hasa’e sirania kapasidade no koñesimentu atu hatudu duni katak iha sirania lideransa própriu mai hosi sirania natureza no sirania karáter rasik,” nia dehan.

Tanba ne’e, lideransa ne’e tenke hahú hosi uma tanba baibain hateten iha portugés katak feto ne’e Dona da Casa, katak uma nia na’in no mane ne’e xefe da familia.

“Uma na’in ne’e, organiza iha uma kain ida no uma kain na’in ne’e mak tenke hatene oinsá organiza nia familia rasik,” nia dehan.

Hanesan, iha organizasaun oinsa nia atu jere, organiza iha organizasaun no iha Estadu mós hanesan ko’alia konaba bainhira dehan hadook an hosi violénsia hasoru feto, hanesan mane sira ne’ebé gosta halo violensia hasoru feto iha uma kain ne’e, sira ne’e la’os xefe familia tanba ne’e feto sira tenke hatudu sirania kbiit rasik.

“Iha istória luta hatudu ona katak feto sira mós kaer kilat hasoru invazor sira no iha ekonomia feto sira mós envolve no hatudu susesu no iha uma kain rasik, maske osan uitoan feto sira jere hatudu katak oinsa bele sustenta familia. Katak, feto sira iha kapasidade própria no kapasidade ne’e labele husik de’it maibé tenke dezenvolve, hasa’e no hakbiit liután,” nia dehan.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here