Osan Dolar Amérika. Imajen/Espesiál

DILI, 08 novembru 2021 (TATOLI)–Taxa ezekusaun reál Orsamentu Jerál Estadu (OJE) 2021 to’o inísiu novembru ne’e atinje ona biliaun $1,062 ka 52% hosi totál orsamentu alokadu biliaun $2,1.

Tuir nota ne’ebé Agência TATOLI asesu iha segunda ne’e, taxa ezekusaun reál ba programa Boa Governasaun no Jestaun Institusionál ezekuta ona millaun $331,6 ka 72%, hosi orsamentu alokadu millaun $458,6, enkuantu taxa ezekusaun reál ba kategoria programa esensiál entidade sira ezekuta ona millaun $731,2 ka 47% hosi orsamentu alokadu biliaun $1,5.

Taxa ezekusaun reál tuir kategória despeza, a’as liu mak iha kategória transferénsia públika 82%, tuir kedan ho saláriu no vensimentu 72%, bens no servisu 41%, kapitál menór 19%, kapital dezenvolvimentu 12% no despeza kontinjénsia 2%.

Ezekusaun fundu COVID-19 to’o iha kinta (04/11) nia ezekusaun reál atinje ona millaun $117,7 ka 41%, hosi totál orsamentu retifikativu alokadu millaun $287,6.

Notísia relevante: 𝐄𝐳𝐞𝐤𝐮𝐬𝐚𝐮𝐧 r𝐞á𝐥 f𝐮𝐧𝐝𝐮 COVID-𝟏𝟗 𝐚𝐭𝐢𝐧𝐣e 𝟒𝟏%

Nune’e, ezekusaun reseita doméstika, iha loron hanesan atinje ona millaun $126,9 ka 68% hosi totál estimativa reseita millaun $187,1. 

Kona-ba ezekusaun iha nível munisípiu, taxa ezekusaun OJE 2021 hatudu progresu di’ak to’o iha inísiu novembru 2021, ne’ebé iha munisípiu haat mak hatudu progresu ezekusaun di’ak liu maka munisípiu Lautém (71%), Manufahi (64%), Ainaro no Covalima (63%), Manatuto (62%).

“Progresu ezekusaun ne’ebé di’ak, sei kontinua fasilita polítika servisu dezentralizasaun hosi VIII Governu Konstitusionál ne’ebé lidera hosi Ministériu Administrasaun Estatál (MAE),” refere nota hosi Ministéroi Finansa (MF). 

Iha OJE 2021, VIII Governu Konstitusionál hahú implementa orsamentu pur Programa ho forma kompletu no tranzisaun ida hosi orsamentu pur item ne’ebé mak implementa desde Timor-Leste restaura nia independénsia tinan 19 liubá.

Notísia relevante: Ezekusaun OJE 2021 foin atinje 50%

Orsamentasaun pur programa hanesan instrumentu ida atu garantia katak osan sira kada tinan Governu foti hosi fundu minarai, kobransa impostu hosi kontribuintes, no empréstimu hosi doadór sira, fó duni benefísiu ba povu, hadi’ak kualidade prestasaun servisu públiku hodi alkanse meta ne’ebé mak Governu aprova ona.

Ho introdusaun polítika foun ne’e, ba oin, VIII Governu Konstitusionál hakarak atu asegura servisu públiku ida ne’ebé prudente ho rasiosinu sosiu-ekonómiku, hakat hosi orsamentu pur item ba orsamentu pur programa hodi asegura rezultadu reál hosi ezekusaun, mak la’ós persentajen ezekusaun de’it no redus númeru programa hosi 145 programa tun ba 45 programa iha tinan 2022 hodi fó biban ba Governu, foku ba kualidade no kontrolu ezekusaun OJE. 

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here