DILI, 08 novembru 2021 (TATOLI)–Institutu Politékniku Betano (IPB) Kay Rala Xanana Gusmão (KRXG), sei realiza seremónia graduasaun ba estudante finalista nível Baxarelatu hamutuk na’in-83, iha kuarta (10/11).
Prezidente IPB-KRXG Acácio Cardoso Amaral, hateten, seremónia graduasaun ne’e hetan ona konsiderasaun hosi Ministériu Ensinu Superiór Siénsia no Kultura (MESKK) tanba antes ne’e submete ona lista kandidatu graduadum fulan-ida molok realiza seremónia.
“Ita-nia estudante finalista diploma II na’in-83 atu simu graduasaun, kompostu hosi Konstrusaun Sivil na’in-35, mane 29 feto neen no Produsaun Animál na’in-48, mane 25 no feto 23,” Dirijente Institutu hateten ba Agência TATOLI, segunda ne’e.
Nune’e, preparasaun seremónia graduasaun iha ona prosesu finál no aban sei iha preparasaun ba estudante sira hodi bele la’o di’ak liután.
“Estudante sira tenke marka prezensa hodi hatene sira-nia fatin, nune’e bainhira seremónia hahú labele mosu problema,” nia akresenta.
Iha sorin seluk, Ministru Ensinu Superiór Siénsia no Kultura, Longuinhos dos Santos, hateten, parte ministériu simu ona lista graduadu no fó lisensa hala’o graduasaun iha tinan ne’e.
“Ida-ne’e regra ne’ebé instituisaun ka universidade sira tenke halo tuir, bainhira realiza seremónia graduasaun, fulan-ida antes, dadus estudante tenke submete ona atu hetan koñesimentu,” governante ne’e dehan.
Jornalista : Tomé Amado
Editora : Julia Chatarina
