Prezidente Komisaun Nasionál Eleisaun, (CNE, siglá portugés), José Agostino da Costa Belo. Imajen Tatoli/Francisco Sony

DILI, 05 novembru 2021 (TATOLI)—Enkarregadu Negósiu Embaixada Estadu Unidu Amérika (EUA), Tom Daley, sesta ne’e hasoru malu ho Prezidente Komisaun Nasionál Eleisaun (CNE-sigla portugés) José Agostinho da Costa Belo hodi diskute kona-ba preparasaun eleisaun prezidensiál 2022.

Prezidente Komisaun Nasionál Eleisaun (CNE-sigla portugés),José Agostinho da Costa Belo, hateten enkontru ne’e bele realiza tanba iha fulan ida liubá Embaixadór Estadu Unidu Amérika hakarak hasoru malu ho Prezidente CNE hodi ko’alia kona-ba eleisaun prezidensiál.

“Objetivu hosi enkontru ne’e, tanba sira hanesan itania parseiru no mós nasaun ida sai hanesan fonte ba demokrasia, entaun sira hakarak hatene tanba kontribuisaun siranian mós ba independensia ne’ebé timor-oan hotu-hotu hetan. Hosi ne’e, sira hakarak dehan, eleisaun sira ne’ebé uluk la’o di’ak ona no eleisaun tuir mai ne’e oinsá no iha tempu pandemia COVID-19 ne’e realiza duni eleisaun ka lae,” José Agostinho da Costa Belo hateten ba jornalista sira iha sala enkontru CNE, Colmera, Dili. 

Iha diskusaun ne’e, EUA hakarak haree Timor-Leste nia preparasaun liu-liu órgaun eleitorál rua hanesan STAE no CNE ho partidu polítiku sira, inklui orsamentu ba eleisaun no mós oinsa asisténsia hosi Nasaun Unida nian.

Enkarregadu Negósiu Embaixada Estadu Unidu Amérika (EUA), Tom Daley, hateten Governu Estadu Unido no Governu Timor-Leste iha kooperasaun di’ak tebes atu apoiu ba eleisaun prezidensiál 2022.

“Agora daudaun seidauk iha kooperasaun no desizaun ne’ebé iha atu apoia ba eleisaun prezidensiál tinan oin nian. Maibé, ida-ne’e sei levanta ba iha Governu Estadu Unidu nian, hafoin ne’e mak ita sei haree fila-fali,” nia dehan.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here