Prezidente Autoridade RAEOA, Arsénio Paixão Bano. Imajen Tatoli/Abilio Elo Nini.

DILI, 04 novembru 2021 (TATOLI)–Rejiaun Administrativa Espesiál Oé-Cusse Ambeno (RAEOA) propoin $ 84,436,784.00 ba iha Orsamentu Jerál Estadu (OJE) 2022. 

“Iha tinan oin, RAEOA prevé millaun 84-resin ho nia foku ba bee-moos, kontrusaun eskola, normalizasaun área protezida sira, atividade sosiál no projeitu sira-ne’ebé kontinua la’o hela,” Prezidente Autoridade RAEOA, Arsénio Paixão Bano, hateten ba jornalista sira hafoin ramata audiénsia públika ho Komisaun E Parlamentu Nasionál iha rezidénsia Prezidente Parlamentu  Nasionál, Faról, Dili kinta ne’e.

Tinan ne’e, RAEOA hetan alokasaun millaun $127 maibé ba tinan oin hetan redusaun tanba planu atividade barak halo iha tinan ne’e.

Bazea ba livru 3-C (RAEOA-ZEESM) iha 2022 prevé hamutuk $84,436,784.00 ne’ebé aloka ba saláriu vensimentu $11,086,859.00, bens servisu $21,361,440.00, kapitál menor $607,155.00, kapitál dezenvolvimentu $47,059,303.00, transferénsia públika $4,322,027.00. Hosi montante refere atu finansia programa 15, sub-programa 95 no atividade 265.

Fonte orsamentu montante $37,377,481.00 mai hosi Governu sentrál hodi finansia kategoria saláriu vensimentu, bens servisu, kapital minór no transferénsia públika hamutuk $47,059,303.00 mai hosi RAEOA rasik atu finansia ba iha kategoria kapitál dezenvolvimentu.

Ba despeza detallu orsamentu tuir kategoria ho ninia justifikasaun.

Saláriu vensimentu

Saláriu vensimentu, despeza ba kategoria ida-ne’e hamutuk $11,086,859.00 hodi asegura saláriu ba funsionáriuu hamutuk ema na’in 2500 ne’ebé dezagrega iha Gabinete Prezidente Autoridade, Adjunta Prezidente Autoridade ba Reforsu Institusional, Adjuntu Prezidente Autoridade  ba Assuntu Sosiál no Sekretária Rejional hitu (7) iha RAEOA no ZEESM.

Bens servisu

Desepeza ba bens servisu $ 21,361,440 hodi asegura kustu operasionál ba Gabinete Prezidente Autoridade, Adjuntu Presidente Autoridade no Sekretáriu Rejional sira hodi implementa programa ka atividade iha RAEOA no ZEESM-TL.

Liña rúbrika orsamentál iha responsabilidade tomak ba Prezidente Autoridade mak sei halo desizaun  ba despeza ba  liña rúbrika servisu operasionál hosi Sekretariadu Rejionál asuntu edukasaun, saúde, traballu no reinsersaun komunitáriu, finansa, administrasaun, agrikultura no komérsiu indústria hodi atende no halo jestaun ba administrasaun refere.

Liña rúbrika manutensaun no kombustivel maiória koloka orsamentu boot iha reponsabilidade Prezidente Autoridade nia Gabinete, atu haree liu ba kombustivel ba EDTL INUR SAKATO, iha mós relasiona ho ekipamentu pezadu ne’ebé hala’o hela atividade iha Oé-Cusse.

No liña rúbrika sira seluk iha kategoria ida-ne’e nu’udar kustu operasionál ba funsionamentu prestasaun servisu iha RAEOA, liña rúbrika viajen estranjeiru hodi atende reuniaun iha rai-li’ur no halo divulgasaun programa RAEOA no ZEESM-TL, mobilizasaun parseiru no investidór, formasaun profisionál no semináriu hodi atende formasaun ba Joven iha Oé-Cusse, formasaun profísionál ba funsionáriu iha RAEOA, kursu profísionál iha nasaun Portugal inklui kursu inglés no portugés. Aleinde ne’e hodi utiliza ba publisidade divulga planu programa projetu ZEESM-TL liuhosi mídia nasionál.

No mós asisténsia téknika hodi asegura apoiu profisionál servisu médiku, servisu profisionál ba Gabinete Prezidente Autoridade, Sekretária Rejional ba Finansa, Sekretária Rejionál Komérsiu Indústria, iha mós servisu seguransa ba edifisu públiku, no apoiu tékniku ba agrikultura no Gabinete PA.

Liña rúbrika ne’e nu’udar responsabilidade tomak ba Prezidente Autoridade mak sei halo desizaun ba despeza asosiadu ho atividade operasionál liu-liu ba operasionál limpeza sidade no edifisíu, selu empreza seguransa no programa sira seluk.

Kapitál minór

Ba iha kapitál minór hamutuk $607155.00 ba tinan 2022 atu asegura kondisaun bázika ba Gabinete Prezidente Autoridade no Gabinete Sekretária Rejionál finansa, Sekretária Rejionál Edukasaun, Solidariedade Sosial hodi sosa ekipamentu eskritóriu, ekipamentu informátika, ekipamentu komunikasaun, ekipamentu bee-moos no seluk tán.

Kapitál dezenvolvimentu

Kapitál Dezenvolvimentu $47 059 303.00 ba 2022. Hosi montante refere, RAEOA no ZEESM-TL prefere orsamentu hosi Likides propriu, hodi finansia obra sira-ne’ebé la’o hanesan insfraestrutura estrada, ponte, infraestrutura edukasaun, irrigasaun no kontrolu inundasaun no seluk tan.

Transferénsia públika

Despeza ida-ne’e $ 4,322,027.00 hodi asegura kustu ne’ebé ho natureza subvensaun publika no Liña rúbrika ida-ne’e nu’udar responsabilidade tomak ba Prezidente Autoridade hola desizaun ba despeza.

No despeza hirak mak hanesan  asosiasaun  koperativa, ONGs no UNDP,  subsídiu ba konsellu suku, PAAS no dezastre naturál, merenda eskolár no konsesaun eskolár.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here