Imajen/Media PR.

DILI, 03 novembru 2021 (TATOLI)—Parlamentu Nasionál kuarta ne’e liuhosi reuniaun plenária extraordinária aprova votu pezár ba saudozu Max Stahl no Bispu Dioseze Baucau, Dom Basilío do Nascimento.

Notísia Relevante: Biografia Bispu Basílio no bele ko’alia lian estranjeira neen

Votu pezar ba éroi Max Stahl fó sentidu profundu kle’an ba matebian no família hodi dignifika kontribuisaun durante  perkursu luta libertasaun hanesan ema-ne’ebé sai defensór defende umanidade povu Timorense hodi halo filmazen masakre 12 novembru 1991 no fó sai ba mundu kona-ba sofrementu povu Timor-Leste iha okupasaun ilegál militár Indonézia, no halo ligasaun ho Falintil ha ai-laran hodi halo entervista no iha tempu ukun an loke sentru audiviziual hodi prezerva istória sira.

Nune’e mós,  PN aprova votu pezár ba saudozu Bispu Dom Basílio do Nasimento hodi dignifika ninia kontribuisaun ba nasaun no igreja katolika durante ne’e. Votu pezár ne’e ho nia rezultadu votasaun a-favór 56, kontra 0 no abstensaun 0.

“Nune’e votu pezár ho númeru 29 ba falesimentu Max Stahl ho númeru 30/V (kuarta) ba Bispu Dom Basílio do Nacimento aprovadu,’’ Prezidente Parlamentu Nasionál, Deputadu, Aniceto Longuinhos Guterres Lopes anúnsia liuhosi plenária.

Votu pezar ba Max Stahl ne’e aprezenta hosi deputadu proponente Cornelio Gama ‘L7’, António Verdial, António da Conceção ‘Kalohan’, David Dias Ximenes ‘Mandati’ no Duarte Nunes.

Nune’e mós votu pez’ar ba Bispu Dom Basílio do Nacimento aprezenta hosi deputadu proponente Patrocinio Fernandes, David Dias Ximenes ‘Mandati’, António de Sa Benevides, Franscisco David, Olinda Guterres no Cornleio Gama ‘L-7’.

Deputadu Fretelin, Marito Mota, hateten Estadu presiza hanoin atu halo monumentu Max Stahl nian tanba ho prezensa militár Indonézia halo iha Timor-Leste, diplomata sira iha mundu lahatene  maibé ho filmazen 12 novembru 1991 ne’ebé Max Stahl filma no publika iha Japaun primeiru ne’e, halo ema  diplomata sira hotu fiar.

Enkuantu, iha sesaun plenária extraordinária kuarta lorokraik ne’e, Parlamentu Nasionál hahú ho kanta hino nasionál ‘Patria! Patria!’ no kontinua kedas ho minutu ida hakmatek hodi fó omenajén ikus ba saudozu Bispu Dom Basílio do Nascimento no ba komemorasaun Loron Nasionál Feto Timor-Leste ne’ebé komemora iha loron 03 novembru, hodi fó omenajen ba buibere sira-nia kontribuisaun iha luta libertasaun.

Notísia Relevante: Max Stahl luta ba umanidade: “In Cold Blood: The Massacre of East Timor”

Jornalista : Nelson de Sousa

Editór       : Cancio Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here