Traballadór feto timor-oan sira hili kafé iha Kooperativa Kafé Timor (CCT, sigla portugés), iha Bidau Akadiruhun. Imajen TATOLI/António Gonçalves

DILI, 03 novembru 2021 (TATOLI)Primeiru-Ministru (PM), Taur Matan Ruak, kongratula inan-feton sira iha Timor-Leste laran tomak, ne’ebé iha loron 03 novembru komemora Loron Nasionál ba Feto.

“Aproveita loron ida-ne’e, hodi VIII Governu Konstitusionál nia naran no ha’u-nia naran rasik, hakarak kongratula inan-feton sira iha Timor-Leste laran tomak, ba loron espesiál ida-ne’e,” Xefe Governu hato’o liuhosi nota imprensa ne’ebé Agência TATOLI asesu, kuarta ne’e.

Governu deside 03 novembru nu’udar loron espesiál ba inan-feton iha Timor-Leste no sai Loron Nasionál ba Feto, tanba hanesan loron mate eroína boot Maria Tapo, atu fó onra ba feto timor-oan hotu ne’ebé ho dedikasaun tomak no brani bele hamriik hamutuk ho asua’in mane sira iha luta kontra okupasaun estranjeiru durante tinan 24, ne’ebé ikus mai Timor-Leste sai duni nasaun ida livre no independente.

“Loron 03 novembru nu’udar loron reflesaun atu ita reflete kona-ba importánsia papel inan-feton sira iha prosesu dezenvolvimentu nasionál,” PM konsidera.

Tanba ne’e, Governu komprometidu tau ema nu’udar sentru ba dezenvolvimentu, nune’e sei halo esforsu hodi envolve inan-feton sira iha prosesu dezenvolvimentu.

Saudoza Maria Tapo hanesan eroína hosi Organização Popular das Mulheres Timorense (OPMT), ho aten brani luta ba dignidade feto hasoru militár indonéziu.

Maria Tapo moris iha suku Tapo, munisípiu Bobonaro, hanesan feto iliterada no ema simples ida, maibé sai hanesan figura ezemplar ba feto sira no hanesan eroína dahuluk ba Luta ba Libertasaun Nasionál.

Molok Indonézia invade Timor-Leste iha loron 07 dezembru 1975, iha ona infiltrasaun inimigu iha área fronteira no iha tempu ne’ebá Forsa Armada Libertasaun Timor-Leste (FALINTIL) halo kedas rezisténsia, enkuantu Maria Tapo hanesan feto ida ne’ebé brani no fen ida ezemplar, fó apoiu maka’as tebes ba nia kaben.

Iha loron 03 novembru 1975, bainhira nia kaben han hela, nia troka nia kaben, Siga Maun nia fatin hodi halo vijilánsia iha linha de fogo, iha abrigu, ho kilat iha liman, derepente inimigu halo asaltu no haree ba situasaun ne’e, Maria Tapo ho aten brani foti asaun reziste hasoru inimigu, hafoin inimigu tiru maka’as tebes hodi kona eroína ne’e no mate kedan iha fatin.

Hafoin eroína ne’e hakotu iis, ninia maluk feto ne’ebé la’o hamutuk nia, haruka kedas karta ba Comité Central FRETILIN ho lian portugés deklara: “As Mulheres de Tapo não rendemos, nem renderemos, lutaremos até a nossa última gota de sangue

Ho lian tetum: “Ami feto Tapo sei la rende, ami sei la rende nafatin, ami sei funu nafatin, ami sei funu to’o ami-nia ran turuk ikus liu.”

Hafoin simu tiha karta, Primeiru-Ministru Repúblika Demokrátika Timor-Leste, Nicolau Lobato, halo inisiativa iha ailaran iha tinan 1976, hodi deside loron 03 novembru sai nu’udar Loron Nasionál ba Feto.

Ho nune’e, iha tinan 1977 hosi sorumutuk Comité Central FRETILIN dekreta Rezolusaun ida ba loron 03 novembru sai nu’udar Loron Nasionál ba Feto Timor-Leste, ne’ebé hahú hosi ne’ebá, kada tinan komemora Loron Nasionál ba Feto.

Hafoin Restaurasaun Independénsia iha tinan 2002, iha Kongresu Nasionál Feto daruak iha tinan 2004, ne’ebé hetan partisipasaun hosi organizasaun feto hotu iha Timor-Leste tomak, maioria maluk feto ezije katak Timor-Leste tenke iha Loron Nasionál ba Feto, atu fó valor ba feto sira ne’ebé manifesta kontribuisaun maka’as ba Luta Libertasaun Nasionál tinan 1975 to’o 1999.

Nune’e, liuhosi Kongresu Nasionál Feto daruak, kongresista sira hato’o ba Parlamentu Nasionál hodi foti desizaun no deside loron 03 novembru sai nu’udar Loron Nasionál ba Feto Timor-Leste.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here