Komunidade sira iha Viqueque selebra loron Finadu. Imajen Tatoli/Vitorino Lopes da Costa.

DILI, 02 novembru 2021 (TATOLI) –  Loron Finadu ne’ebé  selebra iha 02 novembru nu’udar kustume ne’ebé kesi-metin ona timór-oan sira hosi jerasaun ba jerasaun.

Iha munisípiu Covalima, ema barak tau ai-funan no sunu-lilin iha simitériu públiku Besimit iha ámbitu selebrasaun loron Finadu iha suku Taroman, postu administrativu Fatululik.

Lia-na’in hosi uma lisan Aumutin, Silvino Gusmão haktuir, sentidu hosi tau hahán bazea ba kultura ne’ebè bei-ala sira husik hela.

“Kada tinan iha loron 01 fulan-novembru ita tau hahán iha uma-lisan idak-idak nia-aan hodi hasé matebian no hodi husu forsa, atu matebian sira kontinua akompaña nafatin ita. Ne’e kustume ne’ebe kesi-metin jerasaun ba jerasaun,” Lia-na’in hosi uma-lisan Aumutin, Silvino Gusmão informa ba Agência TATOLI, iha suku Taroaman,  aldeia Fatuloro, tersa ne’e. 

Nune’e tama ba loron 02 novembru ne’e nu’udar mós tradisaun ona ho sentidu ne’ebé idéntiku liuhosi tau ai-funan, sunu-lilin ba matebian sira nu’udar klamar nian.

Nune’e mós Diogo Flazio da Cruz informa, tau ai-funan no sunu-lilin iha simitériu públiku hanesan hatudu sentidu domin ba matebian sira. 

Kada tinan vizita rate jintiu Nawalia

Hosi parte komunidade aldeia Ossoua, suku Tirilolo, postu administrativu Baucau Villa, munisípiu Baucau kada tinan vizita rate jintiu ne’ebé eziste dezde bei-ala nia tempu to’o agora.

Rate jintiu Nawalia iha aldeia Ossoua, suku Tirilolo, Baucau villa, munisípiu Baucau. Imajen Tatoli/Natalino Belo.

Lian-nain Uma-kain Kaiwada, aldeia Ossoua, José Belo, hateten, rate refere hanaran Nawalia katak rate iha fatuk kuak ne’ebé kada tinan liuliu iha loron 02 fulan novembru sempre sunu-lilin, tabaku no bua-malus nu’udr símbolu agradese ba matebian.

“Rate ne’e uluk bei-ala sira mak identifika hodi deside hakoi komunidade iha aldeia Ossoua ba tanba seguru no rai mamar,” José haktuir.

José esplika, tempu uluk bainhira komunidade sira seidauk sarani maioria hakoi iha fatin refere no laiha ai-funan, únika sunu lilin tanba tuir fiar ema jintiu.

Bainhira loron finadu to’o, komunidade hosi uma-lisan idak-idak lori lilin, tabaku, bua no malus ba vizita bei-ala sira iha rate refere no bainhira remata ho lian dadolin hodi hosi lisensa atu konvida bei-ala sira ba uma lisan idak-idak hodi hán no hemu hamutuk.

“Avó bei-ala sira, tempu ohin avo sira-nian mai hamutuk ho ami, ita ba imi-nia uma hán no hemu hamutuk, aban dadeer tuku lima mak imi fila mai deskansa fali,” José hamulak.

Iha fatuk kuak nia laran uma-lisan kuaze besik sanulu kompostu, Kaiwada, Lulidasu, Wonolela, Waihau, Sineleki, Kaileki, Rubikai, Kaiwono no seluk tan.

Finadu hasa’e orasaun ba matebian

Responsável Kapela Uaitame, Jacinto Soares hateten, loron finandu importante hodi hasa’e orasaun ba Maromak no matebian sira ba iha Lalehan.

“Liuhosi ita-nia orasaun, orasaun ida espesiál liu. Kada família sira bele reza ba matebian sira no husu Maromak nia bensa, Maromak nia laran luak. Ho Maromak nia domin kasu matebian sira-nia salan iha ahi purgatóriu ninian no lori sira ba Lalehan,” Jacinto Soares akresenta.

Jancinto hatutan, loron finandu ne’e sai hanesan kultura ba sarani Katólia ne’ebé kada tinan família ida-idak tama loron iha 02 novenbru sempre lori lilin no ai-funan hodi kari iha semitériu.

Iha fatin hanesan, Domingas Ximenes, haktuir, loron ne’e nu’udar matebian nian tanba ne’e família sira-ne’ebé moris iha obrigasaun lori lilin no ai-funan hodi ba kari iha matebia sira nian rate.

“Ami-nia família Aidawa Bu’u, ohin loron ami halibur hamutuk hodi lori lilin no ai-funan. Ami mós lori hotu katupa, doxe, bee água no malus hodi tau ba iha matebian sira-nian rate. Bainhira kari ai-funan no lilin hotu hodi fó matak malirin ba ami,” Domingas hateten.

Suku Oel iha Bobonaro

Purtantu, hosi parte komunidade suku Oel, postu administratuvu Bobonaro, munisípiu Bobonaro selebra loron finadu iha situasaun udan laran.

Tuir observasaun Agência TATOLI nota katak, hafoin sai misa iha tuku 12:30 komunidade sira balu mai kari kedas aifuan iha semitériu, tanba situasaun klima limita sira atu selebra loron finadu ho di’ak hanesan tinan kotuk.

RAEOA reza ba Dom Basílio no Max Stahl

Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA), segunda ne’e asegura transporte públiku iha selebrasaun finadu iha Santa Kruz Oé-Cusse La’o di’ak. Santa Kruz nu’udar semitériu públiku ne’ebé lokaliza iha bairru Horta, suku Costa, sub-rejiaun Pante Makasar.

Sarani sira sunu lilin iha Cruz boot Santa Crus, Oé-cusse. Imajen Tatoli/Abílio Elo Nini.

Padre Albino Marques, husu sarani sira atu reza ba matebian Dom Basílio do Nascimentu, Dom Matinho Lopes, Dom Alberto Ricardo da Silva no padre sira seluk no jornalista Max Stahl nune’e bele hetan fatin di’ak iha Maromak nia kadunan Santu.

“Iha tinan 2021, iha eroi boot na’in-rua mak husik hela povu Timor-Leste, Dom Basílio do Nasimentu ho jornalista Max Stahl, ohin ita hotu mai lori ita nia ai-funan ho lilin husu ba Maromak no matebian sira seluk atu fó rahun di’ak ba sira bele hetan fatin di’ak iha maromak nia reinu Lalehan,” Padre Albino Marques iha nia omília.

Istória Finadu

Liafuan Finadu, mai hosi Lian Latinu, katak hotu ona. Signifika fim ka hotu ona no portugueza adota Lian ne’e ba Portugés liuhosi verbu Finar ho forma partisípiu pasadu katak finadu. Lian Ingléz katak, All Souls Day. Finadu katak, hotu ona ka mate ona, to’o limitasaun ona, to’o ona nia rohan. Ema moris no ema ne’e mós sei mate maibé ema ne’e mós labele hatene nia mate.

Hahú kedas hosi Sékulu II, iha ona sinál katak, ema sarani hotu, reza ba sira-nia maluk ne’ebé mate ona no vizita sira-nia rate. Nune’e, lakleur de’it Igreja Katólika, define loron ne’e ba kostume tradisaun iha momentu Sékulu V, sai nu’udar aktu ida hodi hatoman-aan katak dedika loron ne’e hodi selebra no reza ba matebian sira-nia klamar kada família iha uma kain ida.

Iha momentu ne’ebá seidauk iha data fixu ba loron Finadu. Nune’e, iha Sékulu XIII maka responsável Igreja sira universaliza Loron 02 fulan-novembru, nu’udar data fixu no obrigatóriu komemora loron finadu iha mundu katóliku tomak. Sira hili data ne’ebé tuir kedas loron selebrasaun ba Santu hotu-hotu maka iha loron 01 novembru.

Tuir istória nia orijen, loron 2 fulan novembru, nu;udar feriadu Katoliku ba ema sarani hotu hodi reza ba sira-ne’ebé mate ona. Nasaun ne’ebé dominante ho sarani Katóliku adota mós loron ne’e ba feriadu nasional inklui mós Timor Leste.

Ekipa Korrespondente

Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here