Amu Bispo Diocese Dili, Dom Virgilio do Carmo. Imajen Tatoli/Francisco Sony

BAUCAU, 01 novembru 2021 (TATOLI) – Arsebispu Metropolitana no Bispu Dioseze Dili, Dom Virgílio do Carmo da Silva, hato’o sentida klondolénsia ba sarani Baucau relasiona ho Dom Basílio do Nascimento nia mate.

Bispu Dioseze Dili, Dom Virgílio do Carmo da Silva hateten, Dom Basílio nia mate maioria sarani la fiar, maibé ikus mai sarani hotu sente lakon bibi-atan di’ak ne’ebé hadomi no serví sarani Baucau durante tinan 24 laran.

“Iha biban ida-ne’e, ha’u hakarak hato’o sentimentu kondolénsia ba ita-boot sira hotu iha momentu ida-ne’e,” Dom Virgílio hato’o sentiment triste ne’e bainhira dirije misa iha Igreja Katedrál Baucau, segunda ne’e.

Dom Virgílio  agradese ba sarani, padre, madre sira iha Dioseze Baucau tanba fó tempu atu Bispu Dom Basílio horik iha Dioseze Dili durante kalan-rua.

“Ohin, amu nia isin-mate to’o ona mai nia horik-fatin Dioseze Baucau, agradese mós tanba ita boot sira fó biban horik-netik ho ami loron ruma iha Dili,” Dom Virgílio akresenta.

Litúrjia ohin loron nian atu selebra loron santu hotu nian hamutuk ho Dom Basílio nia mate konvida ema hotu atu haree vokasaun sarani nian hodi la’o-tuir dalan santidade.

Reprezentante funsionáriu rezidénsia Bispu Dioseze Baucau, Ernesto da Costa, hakne’ak hatoo liafuan ikus ba Saudozu Dom Basílio do Nascimento iha rezidénsia episkopál Tirilolo, segunda. Imajen TATOLI/Natalino Belo.

“Ema sé mak bele sa’e ba foho, horik iha nai nia kadunan santu ema ne’ebé liman no laran mós, iha liafuan no hahalok inklui lao-tuir loloos Maromak nia hakarak,” Dom Virgílio hateten.

Dom Virgílio rekoñese Bispu Basílio nu’udar pesoál ne’ebé sempre hamnasa, umorista bainhira hasoru situasaun oinoin.

Nune’e mós pesoál ne’ebé nunka sente kolen bainhira hala’o kna’ar nu’udar bibi-atan iha Dioseze Baucau durante tinan-24 to’o husik hela sarani Baucau ne’ebé nia hadomi tebes. Entretantu, Isin-mate Bispu Dioseze Baucau, Dom Basílio do Nascimento to’o ona Igreja Katedrál Baucau.

Tuir orariu, Bispu Basílio hatoba durante loron haat hodi fó oportunidade ba sarani parókia 24 ne’ebé hamahan iha Dioseze Baucau atu hato’o omenajen ikus molok haloot iha Igreja Katedrál, loron kinta (04/11).

Notísia relevante:Biografia Bispu Basílio no bele ko’alia lian estranjeira neen

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here