iklan

BAUCAU, HEADLINE, MUNISÍPIU

Dom Basílio husik hela preparasaun aniversáriu Dioseze Baucau ba dala-25

Dom Basílio husik hela preparasaun aniversáriu Dioseze Baucau ba dala-25

Bispu Dioseze Baucau, Mgr. Basílio do Nascimento. Imajen Tatoli/Joanico de Araújo.

BAUCAU, 30 outubru 2021 (TATOLI) – Iha loron 30 fulan-outubru nu’udar loron ne’ebé tristeza ba sarani munisípiu Baucau tanba Dom Basílo do Nascimento husik hela preparasaun atu selebra Dioseze Baucau ba dala-25 iha tinan oin.

Padre Vigáriu Parókia Katedrál Dioseze Baucau, Padre Adérito Victor da Costa, konsidera Bispu Dom Basílio do Nasimento bibi-atan ne’ebé organizadu iha estrutura ne’ebé hafutar iha Dioseze Baucau nian.

Nune’e molok hakotu iss, Dom Basílio hamutuk ho Padre Dioseze Baucau kria enkontru ida ho tema “Komunga Kristu Moris hanesan Nia” nu’udar planu ba projetu ne’ebé hala’o iha Dioseze Baucau.

Nune’e mós prepara atu selebra aniversáriu Dioseze Baucau ba dala-25 ne’ebé sei realiza iha tinan oin maibé Dom Basílio la konsege selebra hamutuk ho sarani sira tanba Maromak bolu ona nia.

“Tinan oin atu selebra tinan 25 aniversáriu Dioseze Baucau maibé Dom Basílio la konsege selebra hamutuk ho nia sarani sira,” Padre  Adérito Victor da Costa ko’alia iha Baucau, sábadu ne’e.

Dom Basílio do Nasimento nia mate halo sarani hotu iha Baucau hela ho tristeza tanba ne’e husu sarani sira hotu atu reza ba Maromak hanesan parte harohan nune’e Dom Basílio bele deskansa ho hakmatek.

“Husu ba sarani hotu atu bele mai fó omenajen ba ita-nia bibi-atan di’ak Dom Basílio no kontribui halo orasaun reza ba nia, ita taka fulan-outubru hodi harohan, husu tulun ba Maromak atu nia deskansa ho hakmatek,” Padre ne’e husu sarani sira halo orasaun.

Padre Adérito konsidera Dom Basílio ema-ne’ebé hadomi ninia sarani sira, umorista bainhira omília, halimar oituan maibé sentidu domin ba sarani sira boot tebes.

Bispu Dioseze Baucau, Dom Basílio do Nascimento koñnesidu ho umorista bainhira dirije misa liuhoi omília durante selebra misa ba sarani sira iha munisípiu refere.

Iha loron 29 setembru 2021 liubá, Dom Basílio do Nascimento prezide enkontru ekipa traballu ida kona-ba selebrasaun ba bala-25 kona-ba aniversáriu Dioseze Baucau nian.

Relasiona ho festa tinan 25 ne’e ezisténsia Dioseze Baucau nian ho ordenanasaun saserdotál ba diákonu na’in-tolu iha loron 30 novembru tinan ne’e. Komisaun traballu ne’e xefia hosi Padre Arlindo Leonardo Sequeira, realiza enkontru ba dala-tolu hodi diskute hamutuk kona-ba programa no orsamentu ne’ebé mak uza ba festa no atividade iha aniversáriu ba dala-25 iha tinan oin.

Notísia relevante: Sarani Baucau hahú prepara fatin simu Bispu Basílio

Jornalista         : Natalino Belo

Editór               : Evaristo Soares Martins

iklan
iklan

Leave a Reply

iklan
error: Content is protected !!