MEJD anunsia rejuztadu kompetisaun produsaun testu diskursu lian portugés, iha salaun Nobre Ian Martin INFORDEPE, sesta (29/10). Imajen TATOLI/Francisco Sony

DILI, 29 outubru 2021 (TATOLI)—Profesór na’in-tolu sai vensedór iha kompetisaun produsaun testu diskursu lian portugés ne’ebé Ministériu Edukasaun, Juventude, no Desportu (MEJD) realiza ohin loron, iha ámbitu loron nasionál profesór sira.

Tuir Vise-Ministru, Edukasaun Juventude no Desportu, António Guterres, kompetisaun ne’e atu hatene progresu kapasidade profesór jerasaun foun, ne’ebé durante ne’e partisipa formasaun ne’ebé Instituto Nacional de Formação de Docentes e Profissionais da Educação de Timor-Leste (INFORDEPE) realiza ba profesór hotu iha territóriu nasionál.

Vise-Ministru Edukasaun Juventude no Desportu, António Guterres. Imajen TATOLI/Francisco Sony

“Profesór na’in-15 mak partisipa kompetisaun iha faze dahuluk, ne’ebé tama ba faze daruak iha de’it profesór neen no ikus liu faze datoluk profesór tolu hosi munisípiu Dili, Viqueque no Baucau mak sai manan-na’in, profesór hosi Dili sai vensedór dahuluk, profesór hosi Viqueque sai vensedór daruak no datoluk hosi Baucau,” Vise-Ministru  hateten iha salaun Nobre Ian Martin INFORDEPE, Balide, sesta ne’e.

MEJD prevee orsamentu ba vensedór dahuluk $1.500, daruak $1.250, no datoluk $1.000.

Vensedór dahuluk produsaun testu diskursu lian portugés hosi Eskola EBC Fatumeta, munisípiu Dili, Nélia Angelina dos Santos Gago. Imajen TATOLI/Francisco Sony

Vensedór dahuluk hanesaun Profesora hosi Eskola Ensinu Báziku Sentrál (EBC, sigla portugés) Fatumeta, Dili, Nélia Angelina dos Santos Gago, sente orgullu tanba sai manan-na’in iha kompetisaun ne’e, ne’ebé sai esperiénsia boot ba nia no biban ne’e nia enkoraja maluk profesór sira atu iha nafatin vontade aprende, tantu lian tetun inklui portugés, tanba tetun mós iha ninia regra no gramátika.

“Ha’u halo preparasaun la másimu tanba tempu limitadu, maibé obriga halo preparasaun ba produsaun testu sientífiku ida ba kompetisaun ne’e tenke rápidu. Ha’u hanoin ita hotu iha nafatin tempu no oportunidade atu aprende, tanba koñesimentu ne’e nunka okupa fatin iha ita nia-an no memória,” nia dehan.

Vensedór daruak produsaun testu diskursu ho lían portugés, hosi Eskola EBF Uaguia, munisípiu Viqueque, Elídio Pedro. Imajen TATOLI/Francisco Sony

Enkuantu, profesór na’in-rua seluk ne’ebé sai mós manan-na’in iha kompetisaun ne’e maka Elídio Pedro, hanesan profeór iha Eskola Ensinu Báziku Filiál (EBF) Uagia Viqueque no Celina José Freitas, hanesan profesór iha Eskola Ensinu Sekundáriu Jerál númeru 01 Baucau.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here