Kompetisaun kulinária. Imajen Tatoli/Nelia Fernandes.

DILI, 29 outubru 2021 (TATOLI)—Autoridade Munisípiu Dili (AMD) sesta ne’e komemora aniversáriu sidade Dili ba dala252 ho kompetisaun kulinária.

Prezidente Autoridade Minisípiu Dili, Guilhermina Filomena Saldanha. Imajen/Espesiál

“Atividade kompetisaun ida-ne’e kontinuasaun hosi aniversáriu sidade Dili. Tuir loloos kompetisaun ne’e hala’o antes 10 outubru ne’ebé monu ba komemorasaun sidade Dili ba tinan 252, maibé tanba fatór finanseiru entaun ami presiza organiza didi’ak, ne’ebé atividade ida ohin nia puncak ba komemorasaun loron sidade Dili,” Prezidente Autoridade Munisípiu Dili, Guilhermina Filomena Saldanha, hateten ba Agência Tatoli, iha edifísiu Autoridade Munisípiu Dili, sesta ne’e.

Komemorasaun aniversáriu sidade Dili ba dala252 ne’e, Autoridade Munisípiu Dili komemora ho atividade oioin mak hanesan halo kompetisaun kulinária no aprezentasaun kultura ne’ebé mai hosi postu administrativu lima.

“Ohin, ami halo eventu kiik hanesan konvida reprezentante grupu feto sira iha postu administrativu neen atu mai halo kompetisaun konaba tein hahan produtu lokál. Alende ne’e, sei iha mós aprezentasaun konaba itania kultura ne’ebé mai hosi Ataúro no Postu Administrativu Metinaro, Na’in Feto, Cristo Rei, no Karketu,” nia hateten.

Alende atividade rua ne’e, iha mós atividade seluk ne’ebé Autoridade Munisípiu Dili halo ona iha dadeer mak AMD entrega ona kampu multifunsaun jogu iha BJ Habibie ba Administradór Postu Administrativu Cristo Rei atu sai na’in no nia jestór ami entrega ba Xefe Suku Bidau Santana atu responsabiliza.

“Kampu multifunsaun ne’e sei utiliza ba jogu basket ball, volley ball no footal,” nia informa.

Diretora Jestaun Merkadu no Turizmu Munisípiu Dili, Justina Amaral, hateten ba kompetisaun kulinária ne’e iha kritériu lima ne’ebé kontestante ka partisipante sira presiza prenxe hanesan tékniku tein, tempu, ijiéne, aprezentasaun no sabór, hodi nune’e bele sai manan-na’in ba kompetisaun ne’e.

“Lala’ok iha kompetisaun ne’e ami mak prepara aihan no sira (kontestante) mak ho sirania kreatividade rasik hodi prepara ka tein aihan sira-ne’ebé iha hodi sai fali ba menu hahan nian,”   nia esplika.

Maske nune’e, iha kompetisaun ne’e AMD prepara produtu aihan lokál hanesan foos-rai, ikan, naan karau, modo-tahan hanesan aifarina tahan, aidila funan, budu tasi, inklui temperus ba hahan nian.

Iha kompetisaun kulinária ne’e iha juri na’in lima mak sei halo avaliasaun, kompostu hosi Ministériu Agrikultura, Autoridade Munisipiu Dili no Ministériu Saúde (MS).

Enkuantu, kontestante ka partisipante ba kompetisaun kulinária ne’e mai hosi grupu neen hosi Postu Administrativu Ataúro ho naran Manukokerek, Na’in Feto ho grupu Lafaek, Metinaru nia grupu naran Matinaro-Oan, Dom Aleixo ho grupu Feto Madohi, Vera Cruz aprezenta grupu Colmera no Cristo Rei ho nia grupu Raler CR.

Iha kompetisaun kulinária ne’e, manan-na’in dahuluk sei hetan orsamentu ho totál $400, manan-na’in daruak sei hetan $325, manan-na’in datoluk sei hetan 275, manan-na’in dahaat sei hetan $225, manan-na’in dalima sei hetan $175 no manan-na’in daneen sei hetan $150.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here