Prezidente Repúblika, Francisco Guterres Lú Olo, kondekora jornalista funu, Max Stahl, ho Colar Ordem Timor-Leste. Imajen Mídia PR

DILI, 28 outubru 2021 (TATOLI) – Jornalista Christopher Wenner ho koñesidu Max Stahl ne’ebé filma masakre Santa Cruz 12 Novembru 1991 hakotu ona peregrinasaun iha mundu maibé nia espíritu no kontribuisaun ba luta Timor-Leste nian sempre iha povu nia fuan.

“Max Stahl nia mate hanesan lakon boot ida ba Timor-Leste no mundu, maibé Max nafatin iha Povu Timor-Leste nian fuan,” Eis Prezidente Repúblika, José Ramos Horta, hateten ba Agência TATOLI iha nia rezidénsia ofisiál, Faról, Dili, kinta ne’e.

Max Stahl nu’udar jornalista orijen Inglaterra hakotu ona iis iha Ospital Princess Alexandra, Brisbane, Austrália tanba kauza hosi moras kankru.

Max Stahl simu kondekorasaun Ordem da Liberdade hosi Estadu Timor-Leste hanesan aktu valorizasaun ne’ebé aas tanba kontribuisaun ba luta ida-ne’e liuhosi filma akontesimentu masakre Santa Cruz parte ida halo mudansa ba atitude hodi fanu komunidade internasionál oinsá atu apoia independénsia nasaun nian ne’ebé okupa ilegalmente hosi Indonézia.

“Max Stahl nu’udar umanu ne’ebé ho espíritu boot, fuan boot no personalidade boot ba Timor-Leste nia istória, tanba ne’e ha’u-nia sentidu kondolénsia ba Max Stahl,” eis Prezidente Repúblika espresa nia sentimentu.

Cristopher Wenner hahú koñesidu bainhira inísia nia ligasaun ho Timor-Leste iha 30 agostu 1991 hanesan turista no tama iha territóriu atu halo filmajen dokumentáriu ba televizaun independente ingleza nian.

Bainhira Max Stahl prezente iha Timor hasoru líder rezisténsia barak hodi entrevista kona-ba situasaun Timor-Leste nian iha tempu okupasaun ilegál Indonézia.

Max influénsia komunidade internasionál

Veteranu tinan 24 atuál Deputadu iha Parlamentu Nasionál, José Agostinho Siqueira ‘Somotxo’ hato’o sentida kondolénsia ba Max  Stahl ne’ebé husik ona Povu Timor-Leste.

Nune’e Povu Timor-Leste tomak konsidera Max nu’udar kombatente no lutadór ba libertasaun Povu Timor-Leste nian  no espera Maromak simu nia tau iha fatin di’ak.

“Ita hotu hatene ninia reportajen liuhosi fó informasaun ba komunidade internasionál ba violasaun direitu umanu no akontesimentu Masakre Santa Krúz, ninia reportajen influénsia opiniaun públiku internasionál, ne’e nu’udar susesu boot ba Timor-Leste nia rezisténsia,” Somotxo akresenta.

Max Stahl nu’udar jornalista dahuluk ne’ebé hasoru gerilleiru sira iha 1995 no 1996 iha Viqueque, ikusmai hasoru komandante Daitula no Komandante Nino Conis Santana, hodi hato’o reportajen katak rezisténsia povu Timor nian sei eziste.

Nia fó-sai katak, Parlamentu Nasionál iha obriagasaun halo votu pezár ba Max Stahl tanba nu’udar sidadaun onoráriu no kontribuisaun tomak ne’ebé kontribui ba Timor-Leste liuhosi informasaun.

Jornalista         : Florencio Miranda Ximenes

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here