FAO entrega tablet digital hamutuk 14 ba diresaun agrikultura munisípiu Bobobaro. Imajen TATOLI/Sérgio da Cruz.

BOBONARO, 28 outubru 2021 (TATOLI)— Organizasaun Nasaun Unida ba Alimentasaun no Agrikultura (FAO, sigla inglés), kinta ne’e apoia tablet digital hamutuk 14 ba koordenadór estensionista munisípiu Bobonaro hodi fasilita rekolla dadus iha terrenu.

Esplikasaun hosi Koordenadór FAO iha Timor-Leste, Jery Tou, kona-ba  apoia ne’e atu moderniza sistema rekollamentu dadus hosi sistema manuál ba dijitál, hodi mellora serbisu estensionista sai efisiénsia no efikaz.

“Agora sistema hosi nasionál dezenvolve ona ba dijitál, entaun ita presiza apoia tablet ne’e setting hotu tiha ona, hein ba halo kolokasaun dadus de’it, depois manda ba nasionál ho lais-liu, la presiza ba to’o nasionál atu foti surat tahan,” nia ko’alia iha salaun administrasaun postu administrativu Maliana.

Maibé ekipa tékniku FAO sei fó formasaun durante loron-rua, hodi esplika maneira oinsá atu hatama dadus haruka ba nasionál no elementu aplikasaun sira seluk.

Enkuantu programa ida-ne’e implementa ona munisípiu sia (9), no tuir planu sei kobre totál munisípiu 12 no RAEOA.

Reprezentante Diresaun Agrikultura Munisípiu Bobonaro atuál Xefe Departamentu Delegasaun Territoriál Peska, Adriano Leite, hateten durante ne’e estensionista sira sempre enfrenta difikuldade iha terrenu, tanba uza de’it surat-tahan hodi halo rekollamentu dadus iha baze.

“Ami agradese tebes ba FAO, ami hanoin katak teknolojia foun ida ne’e fásil ona ba MAP munisípiu atu atualiza dadus sira iha suku mai munisípiu no ba nasionál,” nia agradese.

Daudaun ne’e númeru extensionista iha munisípiu Bobonaro hamutuk 56, kompostu hosi koordenadór estensionista na’in-neen (6) no estensionista hamutuk 50.

Fasilidade modernu hirak-ne’e, sei apoia estensionista sira halo rekollamentu dadus komuntáriu hanesan peska, floresta, pekuária no dadus agrikultura seluk iha munisípiu refere.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here