iklan

NASIONÁL, HEADLINE, KAPITÁL

Ekipa fiskalizasaun bandu utilizadór viatura Estadu sirkula iha loron finadu

Ekipa fiskalizasaun bandu utilizadór viatura Estadu sirkula iha loron finadu

Viatura Estadu. Imajen TATOLI/Egas Cristóvão

DILI, 28 outubru 2021 (TATOLI)–Ekipa fiskalizasaun konjunta, kompostu hosi Komisaun Antí Korrupsaun (CAC, sigla portugés) no Diresaun Jerál Patrimóniu Estadu hosi Ministériu Finansa (MF), bandu utilizadór viatura Estadu sirkula iha fim-de-semana no loron finadu.

Pontu Fokál CAC, Euclides Vidal Madeira, informa, atu tama loron boot matebian ka finadu, ekipa fiskalizasaun konjunta hakarak fó xamada ba utilizadór viatura Estadu hotu, hahú hosi loron 29 outubru 2021, oras 17:00 otl, viatura Estadu hanesan motorizada no veíkulu hotu tenki destaka iha instituisaun idaidak.

“Sei la autoriza utiliza viatura Estadu hodi desloka ba munisípiu durante loron finadu. Ba Ministériu ka Sekretaria Estadu ne’ebé iha nesesidade servisu atu halo deslokasaun ba munisípiu durante loron finadu, tenke hetan autorizasaun hosi superiór,” Pontu Fokál CAC hateten liuhosi konferénsia imprensa konjunta iha edifísiu Patrimóniu Estadu, Balide, kinta ne’e.

Biban ne’e, ekipa konjunta husu ba responsável lojístika iha instituisaun idaidak atu halo kontrola ba viatura sira hotu no fó xamada ba utilizadór atu kumpre, nune’e bainhira la kumpre xamada ne’e, responsável lojístika iha instituisaun Estadu tenke informa ba ekipa fiskalizasaun konjunta.

“Utiliza de’it viatura Estadu ba servisu seguransa, defeza, saúde, bombeiru, ambulánsia no ekipa ne’ebé responde ba nesesidade urjente hanesan dezastre naturál no asisténsia umanitária,” nia akresenta.

Husu Públiku halo kontrolu movimentu viatura Estadu

Aleinde ne’e, ekipa konjunta ne’e husu ba públiku atu halo kontrolu ba movimentu viatura Estadu durante loron finadu liuhosi hasai foto no halo vídeo, hodi hato’o ba parte kompetente ou bele mós publika iha rede sosiál, atu nune’e autoridade sira bele halo prosesu.

Ekipa ne’e sei koordena ho Polísia Tranzitu nasionál no munisipál hodi halo kontrola ba viatura Estadu durante loron finadu ka matebian no halo vizita supreza ba Ministériu ka Sekretaria Estadu hodi konfirma implementasaun xamada ida-ne’e.

“Ba utilizadór hira ne’ebé mak la kumpre xamada ne’e, sei hetan prosesu administrativa, disiplina no kriminál,” Pontu Fokál CAC afirma.

Iha biban hanesan, Diretór Jerál Patrimóniu Estadu hosi MF, Januário da Gama, hateten, tuir padraun prosedimentu profisionál ne’ebé estabelese ona, fó mandatu ba ekipa konjunta hodi halo koordenasaun no implementasaun kontrolu movimentu viatura Estadu, liliu iha ámbitu loron feriadu, fim-de-semana no períodu normál ka oras servisu ninian.

Servisu ne’ebé ekipa fiskalizadór sei halo mai ho baze ne’ebé prevee iha dekretu-lei númeru 8/2013, ne’ebé define kona-ba utilizasaun viatura Estadu, katak utiliza ba de’it finalidade servisu, entaun utiliza de’it hosi oras servisu no karik iha fim-de-semana ka loron boot maka instituisaun ida sira presiza atu halo movimentu, entaun tenke iha karta autorizasaun ida atu autoriza ninia movimentu.

Iha dekretu-lei ne’e define kona-ba períodu normál viatura Estadu, hosi dadeer tuku 07:00 otl to’o kalan tuku 19:00 otl, no hirak ne’ebé la kumpre no laiha autorizasaun, maka sei hetan sansaun ruma.

“Tanba ne’e, Governu liuhosi ekipa konjunta ne’ebé estabelese ona hanesan tinan kotuk, iha tinan ne’e ita atu komemora loron boot finadu ka loron matebian, komesa hosi fim-de-semana to’o loron 03 novembru maka ekipa konjunta sei halo kontrola movimentu viatura Estadu iha territóriu Timor-Leste ho koordenasaun hosi Polísia Nasionál timor-Leste (PNTL) sei halo delegasaun ba territóriu Timór hanesan ba munisípiu no postu administrativu sira atu kontrola movimentu viatura Estadu,” Diretór Jerál Patrimóniu Estadu dehan.

Tuir Dirijente ne’e, ekipa halo kontrolu hanesan mekanizmu ida no hanesan medida preventivu atubele halo efisiensia ba utilizasaun viatura Estadu ninian.

“Bainhira ita promove efisiensia viatura Estadu, maka sei kontribui mós ba redusaun despeza manutesaun, reparasaun no kombustível ninian, tanba karik la halo, ajente administrasaun públika balun kontinua uza viatura Estadu iha loron boot hodi implika ba kustu manutensaun no kauza ba nesesidade kombustível,” nia tenik.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!