Banner (lona) aniversáriu CNC,I.P nian. Imajen Tatoli//Rafy Belo

DILI, 28 outubru 2021 (TATOLI)-Centro Nacional Chega! I.P, Da memória à esperança, atribui  prémiu apresiasaun ba instituisaun implementadór Rekomendasaun Chega! hamutuk 53, ne’ebé mak la’ós de’it apoiu polítiku maibé mós rekursu finanseiru no rekursu umanu durante nia ezisténsia, iha Antigu komarka, Balide-Dili, kinta kalan.

Prémiu apresiasaun ne’e iha kategória tolu; A, B no C. Prémiu ba kategória A ne’e atribui ba liña ministeriál, sosiedade sívil, ajénsia internasionál no embaixada sira ne’ebé mak iha implementasaun Rekomendasaun Chega! Integra rekomendasaun ne’e iha sira-nia programa no mós aloka orsamentu no rekursu umanu (ema) hodi implementa. Ne’e parseria ne’ebé mak fó vontade tomak atu implementa  Rekomendasaun Chega!

Kategória B mak parseria sira ne’ebé mak iha Nota Entedimentu ho Centro Chega! maibé la tau rekursu hanesan osan no ema. Simu fali rekursu finanseiru no umanu, husi Centro Chega! no parte seluk hodi implementa  Rekomendasaun Chega!

Kategória C mak parseiru sira ne’ebé mak asina de’it Nota Entendimentu maibé la halo tuir saida mak Nota Entendimentu haruka.

Diretór Ezekutivu Centru Nacionál Chega (CNC), Hugo Maria Fernandes. Imajen Tatoli/Francisco Sony.

“Ho prémiu sira ne’e hakarak enkoraja, fó-motivasaun katak Rekomendasaun Chega! ne’e ita hotu nia responsabilidade. La’ós CNC nia responsabilidade de’it satán 204 rekomendasaun ne’e barak liu atribui ba liña ministeriál sira, sosiedade sívil, ba ajénsia internasionál sira. Sira mak tenke implementa la’ós CNC mesak mak tenke implementa,” Diretór ezekutivu CNC, Hugo Maria Fernandes hateten perante públiku, iha ámbitu aniversáriu Relatóriu Chega! ba dala-16.

Nune’e CNC espera: “Ho atribuisaun prémiu ne’e bele enkoraja, insentiva no mós bele motiva parseiru sira para integra rekomendasaun sira ne’e iha sira-nia polítika, programa no atividade”.

Prémiu jornalizmu ba pás “Maria Gorete Joaquim”

Alende prémiu apresiasaun ba instituisaun implementadór Rekomendasaun Chega!, CNC, I.P bazea ba akta deliberasaun Nú. 12/CA/CNC/X/2021 Konsellu Administrasaun CNC ho konsiderasaun iha termu nú. 3.5.3 no 3.5.4 Rekomendasaun Chega! nian atribui mós prémiu ba media online Lafaek News inklui mós media imprensa; Jornál Independente, ho valór prémiu 1.500,00 USD no taxa ho figura Maria Gorrete inklui sertifikadu apresiasaun, ba kada órgaun komunikasaun sosiál rua ne’e.

Lafaek News hetan Prémiu Jornalizmu ba Pás “Maria Gorete Joaquim”  kontribui husi notísia entituladu Tanba moras no lakon komunikasaun, “Juvita” simu demisaun husi Komandu PNTL. Enkuantu, Jornál Independente ho lema Imi-nia Lian, Imi-nia Liberdade ne’e hetan mós oportunidade ba prémiu “Maria Goreta Joaquim” nian ne’e tanba notísia Amika, Inan nurak ne’ebé hela iha tia nia uma.

Prémiu ne’e nu’udar omenajen no lembransa ida ba Saudoza Maria Gorete Joaquim, joven feto ida ho idade 17, ne’ebé envolve aan iha organizasaun UNETIM, organizasaun estudantil ida ne’ebé pro ba Partidu Fretilin iha tinan 1974.

Ho nia konviksaun polítika mak iha tinan 1976, militár Indonézia kaptura nia, hodi dadur nia hahú husi tinan ne’e to’o 1979. Iha fatin dadur oioin, hahú husi Fatin Dadur Tropical Hotel (Dili), Sang Tai Ho (Dili), Sede RTP 15 Teulale (Baucau) no Hotel Flamboyang (Baucau).

Durante dadur, Maria hetan violasaun oioin husi militár Indonézia ne’ebé toma konta iha fatin dadur sira ne’ebé nia dadur ba. Husi violasaun oioin ne’ebé nia hasoru, nia hasai liafuan ida katak: “Sira bele kolonializa ha’u-nia isin, maibé sira sei la kolonializa ha’u-nia espiritu no ha’u-nia fuan”.

Prémiu ba manan-na’in sira entrega direta husi Diretór ezkutivu CNC, Hugo Fernandes, Eis-Prezidente Repúblika, José Ramos Horta, Vise-primeiru-ministru, Armanda Berta dos Santos, Prezidente Konsellu imprensa (CI, sigla portugés), Virgílio Guterres no mós entidade relevante seluktan.

Bainhira sira simu prémiu, tuir observasaun Agência Tatoli nota katak premiadu sira hatudu espiritu entuziasmu ho euforia kontente, hatudu liuhusi sira-nia espresaun oin no hahalok.

Aniversáriu Relatóriu Chega! ba dala-16

Kona-ba aniversáriu Relatóriu Chega! ba dala-16, Diretór Hugo Fernandes akresenta katak CNC hakarak hato’o kongratulasaun no apresiasaun boot ba parseiru sira ne’ebé mak maihusi liña ministeriál sira, institutu públiku sira, organizasaun sosiedade sívil iha rai-laran no mós rai-li’ur inklui embaixada sira iha Timor-Leste, ajénsia internasionál sira tanba tulun tebes CNC hodi implementa Rekomendasaun Chega!

“To’o iha tinan ida ne’e, Centro Chega! estabelese ona parseria ho entidade hamutuk 53. Tinan ida ne’e la’ós de’it atu selebra Relatóriu Chega! nian maibé mós selebra parseria ne’ebé mak di’ak tebes hodi implementa rekomendasaun sira ne’e,” Ezekutivu ne’e informa.

“Haree ba progresu ne’ebé mak ita hasoru no hala’o daudauk no dezafiu sira ne’ebé mak sei mai iha kontestu prezerva memória pasada, tulun sobrevivente sira atu husik hela lisaun pasada ba ita-nia jerasaun foun sira. Ha’u fiar katak ita hotu sei refleta lia-murak ne’ebé mak Saudozu Nicolau Lobato husik hela mai ita katak Ita hatene, ita bele no ita sei manan,” Nia garante.

Iha fatin hanesan, Xefe Uma-sívil Prezidente Repúblika, Francisco Vasconselhos lori Prezidente repúblika nia naran hato’o parabéns ba CNC ne’ebé halo aniversáriu ba dala-16 no mós ba premiadu sira hotu ne’ebé simu prémiu; tantu parseiru sira husi rai-li’ur no mós husi rai-laran.

“Ita-boot sira-nia kontribuisaun hanesan esforsu ida atu hametin pás no memória ne’ebé mak moruk maibé fó-korajen atu ita moris ho dignu liu hanesan Estadu ida,” Xefe Uma-sívil hateten.

Ba parseiru sira ne’ebé mak apoiu ona CNC, Xefe Uma-sívil Prezidente Repúblika, Francisco Vasconselhos hato’o mós agradese uain tanba konsidera katak apoiu sira ne’e importante tebes atu bele dezenvolve memória (pasada) sira moris nafatin iha povu Timor-Leste nia laran. “Ida ne’e mak ha’u hakarak hato’o ba ita-boot (parseiru) sira hotu”.

Lansamentu ezibisaun dokumentál

Iha biban ne’e, Centro Nacional Chega! I.P, Da memória à esperança, liuhusi Xefe Uma-sívil Prezidente Repúblika, Francisco Vasconselhos hamutuk ho Eis-xefe Estadu, José Ramos Horta inklu Vise-primeiru-ministru, Armanda Berta halo mós lansamentu ezibisaun dokumentál.

Dokumentu sira ne’e mak arkivu sira ne’ebé kompostu husi fundu CAVR (Comissão Amizade, Verdade e Reconciliação), fundu CVA (Comissão Verdade e Amizade) no fundu Centro Chega!

Kolesaun arkivu ne’e rejista dokumentu liu 50.000. Husi númeru ne’e, totál 28.301 item mak dijitalizadu no katalogadu ona. Dokumentu istóriku sira ne’e sei fornese no asesu ba públiku iha ámbitu edukasionál, kulturál no seluktan.

Depois lansamentu, Xefe Uma-sívil Prezidente Repúblika, Francisco Vasconselhos hamutuk ho Eis-xefe Estadu, José Ramos Horta inklu Vise-primeiru-ministru, Armanda Berta dos Santos, Vise xefe-estadu maior jenerál Falintil-Forsa Defeza Timor-Leste (F-FDTL), Majór jenerál, Domingos Raul “Falur Rate Laek” no autoridade relevante sira seluk vizita mós estante ne’ebé mak CNC prepara ona iha aredór CNC nian kona-ba memória pasada no dokumentu istóriku pertinente no relevante seluktan.

Entretantu, Centro Nacional Chega! I.P (Centro Chega!) nu’udar institutu públiku ne’ebé mak estabelese liuhusi dekretu lei nú. 48/2016, 14 dezembru, hodi promove implementasaun Rekomendasaun Chega! no Per Memoriam ad Spem, institusionaliza memória no promove direitu umanu liuhusi edukasaun no formasaun, solidariedade ba sobrevivente vulnerável liu kauza husi violasaun direitu umanu no mós kria sentru nasionál memória, peskiza no aprendizajen.

Iha ámbitu aniversáriu Relatóriu Chega! ba dala-16 no atribuisaun prémiu apresiasaun ba instituisaun implementadór Rekomendasaun Chega! Prémiu Jornalizmu ba Pás “Maria Gorete Joaquim”, no lansamentu ezibisaun dokumentál husi CNC ne’e partisipa mós husi Embaixadór Austrália iha Timor-Leste, Peter Robert, Vise xefe-estadu maior jenerál Falintil-Forsa Defeza Timor-Leste (F-FDTL), Majór jenerál, Domingos Raul “Falur Rate Laek”, akadémiku no parseiru sira seluktan.

Iha abertura aniversáriu ne’e, hahú ho Um minuto de silêncio (minutu ida hakmatek) hodi fó-onra no presta omenajen ba éroi no saudozu sira inklui vítima direitu umanu, iha rai-laran no rai-li’ur nune’e mós matebian, Jornalista Max Stahl ne’ebé hakotu iis iha Brisbane Austrália iha loron 28 outubru 2021 tanba moras husi Lider timoroan, José Ramos Horta, akompaña ho deklamasaun ba puízia Borja da Costa nian ho títulu, Um minuto de silêncio, husi autoridade másima CI nian, Virgílio Guterres.

Jornalista: Rafy Belo

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here