Imajen/Mídia SEKOMS.

DILI, 26 outubru 2021 (TATOLI)—Sekretáriu Estadu Komunikasaun Sosiál (SEKOMS) Merício Juvinal ‘Akara’, segunda ne’e halo abertura ba kampaña nasionál kombate hoax no promove internet saudavel faze datoluk ba nível munisípiu.  

“Edisaun ohin ita dedika espesiál ba Munisípiu Bobonaro, ne’e hanesan kontinuasaun ida hosi itania programa ne’ebé ita hakarak halo kampaña nasionál tama sai munisípiu, hanesan dahuluk ita hahú hosi Munisípiu Lautem, daruak Manufahi no agora Bobonaro, ho objetivu ida katak ita hakarak kontinua enkoraza itania sidadaun hodi uza média, liu-liu mídia dijitál ho matenek no kuidadu,” Merício Juvinal ‘Akara’ hateten ba jornalista sira iha Pálacio do Governuu, Díli segunda ne’e.

Halo abertura ne’e, tanba, iha era agora kuandu ema ko’alia buat ruma kada minutu, nia bele afeta ema rihun ba rihun tanba se ema ko’alia loos mak nia impaktu pozitivu maibé se ko’alia sala ka promove fali lia falsu, entaun ema ne’ebé simu lia falsu mós kada minutu ema bele konsumuu lia falsu ho lais,

“Entaun, hanoin katak tempu ona ita promove nafatin edukasaun sivika, atu ema iha kapasidade hodi uza mídia liu-liu mídia dijitál ho di’ak hodi lori sivilizasaun ida-ne’ebé pozitivu ba itania rain,” nia dehan.

Iha situasaun pandemia COVID19, ema aproveita hodi lansa informasaun falsu konaba COVID19 katak vasina, halo komunidade konfuzaun no tauk atu simu vasina tanba de’it rona informasaun falsu, maibé tenke esforsu nafatin katak lia falsu ida-ne’e inimigu ba ema hotu no lia-loos mak sei sai ema hotu nia objetivu.

Tanba ne’e, bainhira halo kampaña hosi inisiu tinan ne’e gráfiku lia falsu hahú tun tanba ema hahú komprende katak lia falsu ne’e prodús hosi ema-ne’ebé laiha responsabilidade.

Sidadaun sira hahú iha matenek, hafoin sira akompaña lee no haree ho matan katak informasaun falsu sira la’ós mai hosi ema matenek no lider sira maibé mai hosi lia-anin no mai hosi fonte sira-ne’ebé la klaru.

Iha biban ne’e, Merício “Akara” informa iha fulan hirak liubá SEKOMS konsege rejista ema uza ID falsu hodi lansa informasaun HOAX kuaze sa’e to’o kazu 90 maibé bainhira akompaña númeru hosi informasaun falsu la sa’e tan.

“Ida-ne’e indikasaun pozitivu hosi itania kampaña sira. Maibé ita labele para tanba dala ruma nia hanesan hein, maibé iha tempu balun nia lansa fali. Tanba ne’e, ita hakarak to’o munisípiu hotu ho lian ida katak HOAX ne’e itania inimigu,” nia dehan.

Entretantu, iha abertura ba kampaña nasionál kombate HOAX no promove internet saúdavel faze datoluk ba nível munisípiu, marka prezensa hosi oradór na’intolu hanesan Prezidente Konsellu Imprensa (CI, sigla portugés) Virgílio da Silva Guterres, Na’in ba GMNTV, Jorge Serano no Tékniku Profisionál SEKOMS Cipriano de Oliveira.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here