Fromatura PNTL iha aniversariu PNTL ba da-XX, 27 marsu 2020. Imajen Tatoli/Eugénio Pereira.

DILI, 26 outubru 2021 (TATOLI)—Ministériu Finansa (MF) hein hela dokumentu balun hosi instituisaun Polísia Nasionál Timor-Leste (PNTL) no Ministéiru Defeza (MD) hodi sertifika nia funsionáriu liña frente ne’ebé presta ona servisu esensiál iha ámbitu COVID-19, hodi bele prosesa pagamentu suplementu remuneratóriu.

“Lista liña frente hosi PNTL no Ministéiru Defeza antes ne’e submete ona ba Ministéiru Finansa verifika no identifika barak mak inklui funsionáriu ne’ebé la servisu direta periódu COVID-19 nune’e devolve fila. Tan ne’e, ami agora daudaun kontaktu hela PNTL no Ministéiru Defeza atu emite despaixu ba sira-ne’ebé iha lista defaktu servisu duni kumpre orden hosi superiór tuir prosesu hotu iha semana ne’e ka semana oin bele halo pagamentu,” Ministru Rui Gomes, hateten hodi responde preokupasaun membru parlamentu sira-nian iha ámbitu debate estensaun estadu emerjénsia ba dala-XIX, iha Parlamentu Nasionál, tersa ne’e.

Governante ne’e hateten, tuir dekretu lei númeru 13/2021 sai iha loron 24 agostu liu-bá, no iha primeira lista ka submisaun ne’ebé Ministéiru Finansa simu iha loron 15 setembru, hafoin tuir mai lista sira seluk.

“Ezemplu hanesan Ministériu Interiór ne’ebé tama iha loron 24 no 27 setembru ho mós lista seluk, ita verifika tuir dekretu lei katak traballadór sira iha administrasaun públika ne’ebé servisu ba prevensaun COVID-19 ho kondisaun direta,” nia dehan.

Iha lista sira-ne’e barak mak inklui funsionáriu ne’ebé la servisu direta ho COVID-19, tanba ne’e Ministéiru Finansa halo verifikasaun hodi devolve no husu entidade relevante ajuda dokumentu sira ho despaixu ruma hosi ierárkia katak ema ne’e hala’o duni servisu iha terrenu.

Iha loron 28 setembru, MF simu tan lista hosi Ministéiru Interiór, Sekretária Estadu Protesaun Sivíl, Seguransa, Bombeirus, Alfadega, Kaza Sivíl Prezidente Repúblika no seluk tan, situasaun ne’e hanesan hodi devolve fila-fali.

Tanba ne’e, nia dehan, iha setembru nia rohan ne’e MF halo verfikasaun lista no daudaun ne’e komunika hela ho instituisaun PNTL no Ministéiru Defeza atu emite despaixu hein kompleta bele halo pagamentu iha semana ne’e ka semana oin.

“Osan ne’e Estadu nian tenke iha baze legal. Se laiha baze, ita kaer fó arbiru de’it, nune’e aban-bainrua ami mak sala,” nia hateten.

Ministéiru Finansa mós halo tiha ona pagamentu iha semana kotuk ba funsionáriu 143 hosi Dirasaun Servisu Imigrasaun, funsionáriu 449 hosi Sentru Integradu Jesaun Krize (CIGC, sigla portugés) ho orsamentu rihun $482 tanba sira-nia lista laiha problema.

To’o agora, nia informa, hosi Ministéiru Saúde, Kuarantena, Ministéiru Agrikultura, AIFAESA, Servisu Nasionál Intelijénsia no Aportil ninia lista seidauk tama iha Ministéiru Finansa.

Totál benefisiáriu PNTL 3.821 no F-FDTL 2.112

PNTL iha totál benefisiáriu 3.821 no totál orsamentu ne’ebé aloka ba suplementu remuneratóriu ba instituisaun ne’e hamutuk $5.130.280, ba períodu fulan-marsu to’o maiu 2021 no daudaun iha prosesu verifikasaun no kompleta dokumentu nesesáriu balun.

FALINTIL-Forsa Defeza Timor-Leste (F-FDTL) iha benefisiáriu hamutuk 2.112, ho totál pagamentu montante $6.510.075 ba períodu fulan-fevereiru to’o agostu 2021, ne’ebé daudaun iha prosesu verifikasaun no kompleta dokumentu nesesáriu balun.

Guarda Prizionál sira hamutuk 205, totál pagamentu hamutuk $282.675, ba períodu abríl to’o agustu 2021.

Maski nune’e, ba F-FDTL nian, Sekretariadu sei hato’o pedidu atu hetan Pareser Jurídiku ba Gabinete Apoiu Jurídiku no iha verifikasaun dokumentu, Sekretariadu identifika laiha aneksu despaixu hosi Jestór Másimu kona-ba pesoál liña-frente, maibé iha de’it mak Orden Operasaun inklui laiha asinatura lista prezensa.

Prezidente Repúblika, Francisco Guterres Lú Olo, promulga ona altersaun daruak ba Dekretu-Lei Suplementu Remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 bainhira orsamentu Jerál Estadu (OJE) 2021 ramata, karik presiza hatutan suplementu ne’e ba tinan 2022, presiza iha fali Dekretu-Lei foun ida.

Dekretu-Lei kona-ba Suplementu Remuneratóriu define profisionál elejível ba direitu hetan direitu mak médiku, efermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no F-FDTL ne’ebé envolve iha prevensaun no kontrolu COVID-19.

Nune’e mós, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentar (AIFAESA), Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia,  Diresaun Nasionál Seguransa Patrimóniu Públiku, no servisu autoridade ka administrasaun munisipál,  responsável ba halibur, lori no soe lixu, sira ne’ebé hola parte servisu autoridade ka administrasaun munisipál, servisu munisipál ba fornesimentu bee-moos, koveiru sira no sira ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-cusse Ambeno (RAEOA).

Antes ne’e, Prezidente Repúblika promulga Dekretu-Lei númeru 17/2020 loron 30 abríl, hodi fó direitu ba traballadór liña frente, atu ida-idak simu mós suplementu remuneratóriu ida, ho efeitu hosi marsu 2020, maibé iha fulan-setembru 2020, Dekretu-Lei ne’e hetan alterasaun dahuluk.

Nune’e, ho alterasaun daruak ba Dekretu-Lei ne’e, aumenta tan profisionál sira-ne’ebé iha direitu ba hetan suplementu  remuneratóriu ne’e hanesan tékniku sira-ne’ebé partisipa iha programa vasinasaun kontra COVID-19, Guarda Prizionál, sira-ne’ebé servisu protesaun sívil, inklui bombeiru no traballadór sira seluk ne’ebé hala’o serbisu iha sentru izolamentu, profilátiku ka terapéutiku,  no sira-ne’ebé kuida pasiente COVID-19 sira hanesan tau matan ba  seguransa no servisu limpeza no mós sira-ne’ebé halo jestaun lixu.

Notísia Relevante: MF halo pagamentu suplementu remuneratóriu pesoál liña frente CIGC

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here