KRAM sensibiliza foinsa'e mileniál forsa kriativa re-integra GAM ba sosiedade. Imajen TATOLI/Abílio Elo Nini.

OÉ-CUSSE, 26 outubru 2021 (TATOLI) — Komisaun Reguladóra Arte Marsiál (KRAM), tersa ne’e hala’o sensibilizasaun polítika rua hosi Sekretaria Estadu Joventude no Desportu (SEJD) kona-ba prosesu reativa Grupu Arte Marsiál (GAM) iha Rejiaun Administrativa Espesiál Oé-Cusse Ambeno (RAEOA).

“VIII Governu mai ho polítika rua, primeiru foinsa’e mileniál forsa kriativa, re-integra arte marsiál ba sosiedade enkuadra ba modalidade desportiva, tanba polítika ne’e Governu ajenda ona atu halo reativasaun atu promove modalidade desportiva iha Timor-Leste,” Prezidente KRAM, Octavio da Conçeição, ko’alia sede organizasaun Ikatan Kera Sakti (IKS), iha suku Lifau, sub-rejiaun Pante Makasar, tersa ne’e.

Objetivu hosi sensibilizasaun ne’e atu reativa atividade arte-marsiál iha teritóriu nasionál no motiva GAM atu uza organizasaun hatuur disiplina, promove dame no unidade nasionál, nune’e bele hetan legalidade hosi Ministériu Justisa.

Nia fó hanoin ba organizasaun arte-marsiál sira labele hanoin treinu de’it maibé bele kria grupu ba atividade sira-ne’ebé produtiva, bele harii grupu hakiak animál no kuda produtu lokál.

Tanba polítika SEJD mai ho polítika foinsa’e mileniál forsa kreativa ne’e atu enkoraja sai matenek kreativa no badinas iha sosiedade.

Prezidente Sub-KRAM RAEOA, Zeferino da Cruz Salu, agradese tanba bele halo sensibilizasaun ba organizasaun arte-marsiál sira hanesan, IKS, PSHT no KORK hodi observa direita kondisaun organizasaun sira-nia eskritóriu iha enklave ne’e.

“Arte-marsiál tenke kuda-metin dame, pás no estabilidade hodi garante estabilidade no kontribui ba prosesu dezenvolvimentu nasionál,” nia tenik.

Koordenadór IKS RAEOA, Canisio Ole, agradese ba Guvernu liuhosi SEJD liuhosi ekipa KRAM hala’o ona sensibilizasaun ba familia boot IKS iha RAEOA.

Notísia relevante: KRAM enkoraja estudante ESG Palaban hakribi violénsia

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here