Brigadeiru Jenerál Cornelio Ximenes “Maunana” tula hela diviza ho postu Kabu ba membru Komponente Navál, iha Hera, Dili, segunda ne’e. imajen/ Natalino Costa.

DILI, 25 outubru 2021 (TATOLI)— Komandu FALINTIL Forsa Defeza Timor-Leste (F-FDTL) halo promosaun diviza ba membru Komponente Navál na’in-24 hosi postu Soldadu ba postu Kabu.

Serimónia promosaun diviza ne’e lidera hosi Brigadeiru Jenerál Cornelio Ximenes “Maunana” iha Komponente Navál iha Hera, Dili, segunda ne’e.

Biban ne’e, Brigadeiru Jenerál Maunana, hateten, promosaun diviza ba membru navál na’in-24 hosi Soldadu ba postu Kabu importante tanba aumenta rekursu umanu iha instituisaun F-FDTL liuliu iha Komponente Navàl.

“Ha’u kongratula no fó parabens ba membru Komponente Navál Forsa Lijeira nain-24 ne’ebé promove hosi soldadu ba postu kabu Kabu,” Birgadeiru Jenerál Maunana, hateten, iha ámbitu serimónia promosaun diviza ne’e.

Nune’e, Brigadeiru Jenerál Maunana husu ba membru sira atu kontinua ezerse knaar ho resposabilidade militár, garante seguransa no paz hodi hetan konfiasan hosi sidadun sira.

Komandu F-FDTL mós husu ba membru promovidu-sira atu kontinua serbí ho knaar profisionál hodi kontribui ba dezenvolvimentu instituisaun no nasaun.

Iha biban hanesan, Komandante Komponente Forsa Navál, Kapitaun Fragata João da Silva, afirma, promosaun diviza ba membru hirak ne’e ho modalidade pur eskolla ho antiguidade.

“Ita halo promosaun haree hosi membru sira nia hahalok di’ak no serbisu tuir iha instituisaun nia kaharak. Nune’e promosaun ne’e pasu importante atu rekoñese membru sira nia dedikasaun,” Komandante ne’e akresenta.

Membru nain 24 ne’ebé promove hosi postu Soldadu ba kabu, frekuenta kursu durante fulan-tolu iha sentru formasaun F-FDTL Metinaro.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here