Prezidente Autoridade RAEOA, Arsénio Paixão Bano, observa hela grupu feto soru-tais iha suku Naimeco. Imajen/mídia ZEEMS.

OÉ-CUSSE, 22 outubru 2021 (TATOLI) — Autoridade Rejiaun Administrativa Espesiál Oé-Cusse Ambeno (RAEOA), liuhosi Gabinete Prezidente Autoridade ba serbisu promosaun igualdade no inkluzaun apoia orsamentu rihun $94 ba Asosiasaun Feto Mudansa Ekonomia Família (AFMEF).

Apoia ne’e ho objetivu prinsipál atu finánsia feto potensiál sira, atu kontinua presta nafatin sira-nia profisionalidade no kreatividade soru-tais, liuhosi serbisu promosaun igualdade no inkluzaun, hodi foka liubá feto potensiál sira-ne’ebé durante ne’e halo agrupamentu.

Nune’e mós bele kontinua promove sira-nia talentu ba soru-tais Oé-Cusse nian atu promove iha merkadu ho eskala rejionál no internasionál.

“Polítika autoridade nian hakarak enkoraja feto potensiál sira-nia talentu kona-ba kualidade soru-tais, promove ita-nia kultura nu’udar atoni O’e-Cusse, entaun feto sira-nia profisaun durante envolve hala’o kreativu soru-tais nune’e sai di’ak liután iha futuru” Prezidente Autoridade RAEOA, Arsénio Paixão Bano, ba Agência TATOLI, iha Oé-Cusse, sesta ne’e.

Prezidente Autoridade RAEOA NE’E agradese ba feto potensiál sira, tanba produtu tais Oé-Cusse nian Governu Sentrál promove ona iha estranjeiru liuhosi feira Expo Dubai.

“Programa ne’e kapaas tebes, autoridade sei kontinua tau matan, iha tinan oin presiza envolve tán inan feto sira seluk hodi promove nafatin kór tais Oé-Cusse ba oin, tanba tais Oé-Cusse kualidade, no foin daudaun ne’e Governu Sentrál lori ba promove iha Expo Dubai,” nia orgullu.

Entretantu, Koordenadora Asosiasaun Feto Mudansa Ekonomia Família, Joana Bobo Tanu, agradese ba Autoridade RAEOA ne’ebé tau-matan ba feto potensiál sira hamutuk grupu 34 hodi hodi promove kreatividade soru-tais nu’udar kultura Oé-Cusse nian.

Koordenadora ne’e haktuir, durante ne’e ekipa avaliasaun hosi AFMEF identifika grupu feto 34 iha faze dahuluk, mai hosi suku 18 hamutuk 34 mak asesu uluk ba fundu ne’e, kada grupu envolve feto na’in-10 ho fundu $2,500 atu dezenvolve tais.

Asosiasaun Feto Mudansa Ekonomia Família planeia atu harii sentru merkadu tais iha Oé-Cusse nune’e ba oin funsionáriu sei uza produtu tais iha edifisiu públiku.

Entretantu, daudaun ne’e Asosiasaun Feto Mudansa Ekonomia Família fasilita ona formasaun ba grupu hitu ona iha suku lima, hanesan iha sub-rejiaun Pante Makasar.

Nune’e mós iha suku Nipani, aldeia Sakato, suku Costa iha aldeia Mahata, suku Naimeco, aldeia Baqui, suku Taiboko iha aldeia rua, no iha sub-rejiaun Nítibe, suku Suni-Ufe.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here