Ministru Koordenadór ba Asuntu Ekonómiku (MKAE), Joaquim Amaral, entrega simbolokamente apoiu fundu ba empreza benefisiáriu, iha salaun IADE, Bebora, sesta (22/10). Imajen TATOLI/Egas Cristóvão

DILI, 22 outubru 2021 (TATOLI)–Institutu Apoiu Dezenvolvimentu Emprezariál (IADE), iha sesta ne’e, entrega fundu ba empreza selesinadu na’in-19 hodi finansia atividade negósiu, ne’ebé iha seremónia ne’e reprezenta de’it hosi empreza na’in-neen.  

Programa ne’e nu’udar apoiu programa fasilidade inkubasaun negósiu.

“Empreza sira ne’ebé hetan direitu finanseiru, antes ne’e iha ona atividade negósiu, tanba ne’e inisiativa ne’e hodi kontinua negósiu tanba bainhira atividade iha ona, signifika iha koñesimentu, tanba ne’e Governu presiza fó apoia hodi sai ezemplu ba sira seluk no inspira joven hodi hili vida emprezariál hanesan dalan ida atu hadi’a ekonomia,” Ministru Koordenadór Asuntu Ekonómiku (MKAE), Joaquim Amaral, hateten, iha ámbitu seremónia entrega fundu operasionál, ekipamentu no materiál ba mediu no pequeno empreza, iha salaun IADE, Bebora.

Notísia relevante: IADE apoiu $113.000 ba empreza selesionadu 19 programa inkubasaun negósiu

Governante ne’e, husu ba empreza ne’ebé sai benefisiáriu atu utiliza fundu ho di’ak hodi dezenvolve negósiu, nune’e bele finansia ekonomia no ema seluk liuhosi atividade no produtu sira.

Iha biban hanesan, Diretór Ezekutivu IADE, Filomeno Marcelino Belo, hateten, empreza benefisiáriu sira liu ona etapa naruk ida.

Diretór Ezekutivu IADE, Filomeno Marcelino Belo. Imajen TATOLI/Egas Cristóvão

“Prosesu ne’e naruk tebes, hahú hosi kliente sira submete proposta ba IADE no ekipa sei ba halo avaliasaun, hafoin lori rezultadu avaliasaun ba ekipa téknika sira, katak negósiu empreza ne’e merese duni hetan apoia ka lae, bainhira merese duni entaun parte administrasaun akompaña hodi halo planu negósiu, nune’e bainhira merese duni, na’in ba empreza aprezenta planu negósiu ba xefia sira atu deside hodi aprova,” nia esplika.

Nune’e, bainhira aprova tenke trata dokumentu legál sira hodi nune’e bele realiza prosesu aprovizionamentu atubele halo pagamentu.

Kritéria dahuluk ba empreza atu hetan direitu ba fundu maka ninia negósiu tenke eziste nanis, produtu tenke úniku, tenke iha inovasaun no iha merkadu rasik ba produtu.

Objetivu apoiu fundu maka atu eleva empreza nia kapasidade atu aumenta volume produsaun, hadi’a kualidade produtu, apoia kustu operasionál, no aumenta ekipamentu.

Empreza benefisiáriu agradese ba Governu

Iha biban hanesan, Reprezentante Emprezáriu no na’in  empreza Futs Furaq Unip Lda, Sandra Alves do Rego, lori emprezáriu nia naran agradese ba Governu liuhosi IADE, ne’ebé durante ne’e akompaña ptosesu.

Reprezentante Emprezáriu, Sandra Alves do Rego, simu simbolokamente apoiu fundu, iha salaun IADE, Bebora, sesta (22/10). Imajen TATOLI/Egas Cristóvão

“Lori maluk emprezáriu hotu nia naran agradese ba IADE ne’ebé durante ne’e akompaña no apoia maka’as tebes ba media no pequena empreza, ne’ebé sai empreendedór, maski iha tempu COVID-19 maibé nafatin fó atendimentu di’ak mai ami,” Sandra Alves dehan.

Na’in ba empreza Futs Furaq Unip Lda, konsidera apoiu ne’e útil tebes tanba bele hamoris hikas espíritu empreendedorizmu iha sira-nia negósiu.

“Ami sei utiliza no implementa ho responsabilidade fundu atu garante negósiu bele la’o di’ak no iha sustentabilidade hodi dezenvolve empreza idaidak iha Timór,” nia akresenta.

Empreza 19 ne’ebé hetan apoia fundu mak hanesan Futus Furaq Unip Lda, ho tipu negósiu prodús vestuáriu diversifikasaun tais ho valór $5.235, empreza Pasiensia de Mae, tipu negósiu prodús tahu no tempe ho valór $6.000, empreza Thalia Modista, tipu negósiu diversifikasaun tais lokál ho valór $6.300.

Empreza Nheu Alovmy, tipu negósiu Guest House ho valór $10.000, empreza Fugonti Lda, tipu negósiu casa produsaun filme, video TVC ho valór $8.300, empreza Dep Lay Unip Lda, tipu negósiu Alfaiate Bebonuk ho valór $8.500, empreza K2C original Lda, tipu negósiu kafetaria ho valór $4.300, empreza NR Company, tipu negósiu kafetaria no industria kafe ho valór $5.000, empreza Piscium Azurium, tipu negósiu kafetaria ho valór $3.000, empreza Mira Danapere, tipu negósiu Alfaiate, suku roupa ho valór $4.000.

Nune’e mós, empreza Jupa Peji Udan Piska, tipu negósiu hakiak ikan Nila no ikan mas ho valór $5.000, empreza Romo Lima Enin, tipu negósiu plantasaun kuda kakao ho valór negósiu $11.500, empreza ristorante Aijivo, tipu negósiu mini restaurante ho valór $4.400, restaurante Ribelo, tipu negósiu restaurante ho valór $5.000, Kooperativa Lo’ud ho valór $5.000, empreza Hibatirrokab Nunes, tipu negósiu haki’ak no habokur karau ho valór $3.500,  empreza Fini foun, tipu negósiu plantasaun kuda kakao ho valór $3.300, empreza Nudata, tipu negósiu plantasaun kuda salak ho valór $3.300, empreza Noemio Caiseba Unip Lda, tipu negósiu hakiak fahi no manu ho valór 11.765

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here