Traballadór timor-oan prepara atu arranka ba Koreia Súl, iha Aeroportu Internasionál Prezidente Nicolau Lobato, Comoro, kinta (21/10). Imajen TATOLI/Egas Cristóvão

DILI, 21 outubru 2021 (TATOLI)–Governu Timor-Leste liuhosi Sekretaria Estadu Formasaun Profisionál no Empregu (SEFOPE), iha kinta ne’e, haruka traballadór timor-oan hamutuk 60 hodi bá serbisu iha Koreia Súl ho aviaun Citilink.

Diretór Nasionál Empregu Exteriór hosi SEFOPE, Filomeno Soares, hateten, traballadór ne’ebé ohin aranka prienxe ona rekezitu hanesan simu vasina kompletu, tama kuarentena kalan ida no halo teste PCR ho rezultadu negativu molok halo viajen.

Diretór Nasionál Empregu Exteriór hosi SEFOPE, Filomeno Soares. Imajen TATOLI/Egas Cristóvão

“Rekezitu hirak ne’e mak Governu Koreia Súl fó mai ita hodi kumpre. Traballadór ne’ebé ohin aranka bá Korea Súl ne’e hamutuk na’in-60 mane hotu, kompostu hosi traballadór tuan ne’ebé antes ne’e bá serbisu ona iha ne’abá, maibé agora hetan tan oportunidade serbisu iha área fábrika hamutuk 19, agrikultura 16 no peska 25,” Diretór Nasionál informa iha Aeroportu Internasionál Prezidente Nicolau Lobato, Comoro.

Notísia relevante: Traballadór timor-oan 71 sei desloka ba Koreia Súl iha outubru

Kada traballadór ne’ebé arranka responsabiliza rasik viajen hosi Timor-Leste to’o Koreia Súl hamutuk $4.000 ba ema ida, ne’ebé inklui ona ho billete aviaun, viza no kuarentena molok desloka.

Traballadór timor-oan prepara atu arranka ba Koreia Súl, iha Aeroportu Internasionál Prezidente Nicolau Lobato, Comoro, kinta (21/10). Imajen TATOLI/Egas Cristóvão

“Bainhira sira to’o Koreia Súl, sei tama kuarentena durante loron-14 ho ninia kustu ba traballadór ida hamutuk $1.500, ida-ne’e difikuldade oituan ba traballadór sira, maibé ida-ne’e hanesan kritériu hosi Governu Koreia Súl, tanba situasaun COVID-19 nasaun hotu iha ninia protokolu saúde rasik,” nia hateten.

Nia dehan, traballadór sira ne’ebé ohin arranka bá Korea Súl, Governu halo ona preparasaun másimu, tanba ne’e espera labele akontese fallansu ruma iha sira-nia viajen to’o fatin destinasaun, nune’e Governu Koreia Súl kontinu fó fiar nafatin simu traballadór timor-oan.

Nune’e, traballadór 60 nia kontratu mínimu tinan-tolu no másimu tinan-haat fulan-ualu.

“Totál traballadór timor-oan ne’ebé daudaun ne’e hala’o servisu iha Korea Súl hamutuk 3.000 no durante iha situasaun COVID-19 ita haruka uluk traballadór 63 no agora haruka tan na’in-60,” nia hateten.

Ba oin, Governu Timor-Leste sei kontinua prepara timor-oan tanba mobilizasaun traballadór ba estrajeinru la haree ba kada tinan mak haruka, maibé depende ba demanda hosi rai-li’ur.

Traballadór, Armindo Afonso. Imajen TATOLI/Egas Cristóvão

Iha fatin hanesan, Traballadór, Armindo Afonso, hateten, halo ona preparasaun durante tinan-rua resin no nia sei serbisu iha área fábrika.

“Kontratu ne’ebé ha’u asina ho durasaun tinan-lima, hahú tinan 2020-2025 maibé tanba COVID-19, ohin mak foin arranka,” nia akresenta.

Tanba ne’e, nia iha esperansa bainhira tama serbisu, bele hetan esperiénsia ruma, nune’e bainhira fila mai Timór bele aplika.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here