Imajen/Espesiál.

DILI, 21 outubru 2021 (TATOLI)—Sekretáriu Jerál Partidu Unidade Dezenvolvimentu Demokrátiku (PUDD), José Monteiro, hateten PUDD sei deside kandidatura Prezidente Repúblika atu kompete iha eleisau prezidensiál 2022 liuhosi konferénsia nasionál.

“PUDD nia preparasaun, tuir estatutu, atu apoiu kandidatura ida ka kandidatura partidu nia ema rasik, sei liuhosi konferénsia nasionál partidu nian. Ka bele, liuhosi enkontru ordináriu Konsellu Nasionál Fiskál Polítika Permanente (KNFPP) mak sei deside,” José Monteiro hateten ba Agência Tatoli liuhosi telefónika, kinta ne’e.

PUDD nia preparasaun ba eleisaun prezidensiál daudaun ne’e la foku maibé sei foku ba eleisaun parlamentár iha 2023. Tanba ne’e, atu apoiu kandidatura ruma ne’e liuhosi konferénsia mak sei deside.

“Partidu sei analiza ba kestaun polítika, ekonomia, sosiu kultura iha eleisaun prezidensiál ba apoiu ida-nia impaktu iha eleisaun parlamentár tuir mai ba partidu oinsá, nune’e ida-ne’e sei haree hotu,” nia dehan.

Internalmente PUDD nia foku liu-bá eleisaun parlamentár nian no eleisaun prezidensiál hanesan parte ida Estadu nian, Prezidente Repúblika ida-ne’ebé iha sentidu Estadu kumpre konstituisaun, entan PUDD nia kontribuisaun hakarak atu hili Prezidente Repúblika ne’ebé bele respeita konstituisaun.

Servisu ne’ebé partidu halo daudaun ne’e mak konsolidasaun partidu la’o hela hodi disemina polítika partidu nian, reforsa estabelese estrutura iha baze hosi nasionál to’o munisípiu no aldeia hotu ona, mak sei prepara ba iha orgaun PUDD nian hanesan orgaun feto partidu, orgaun profisionál partidu ho orgaun sira seluk hafoin ne’e sei prepara ba kongresu iha tinan oin (2022).

“Kongresu ne’e iha intensaun tolu (3) hanesan sei ko’alia kona-ba manuál partidu no programa, hadia estatutu no hili estrutura,” nia sdehan.

Notísia Relevante: UDT laiha kandidatura kompete iha eleisaun prezidensiál 2022

Jornalista : Nelson de Sousa

Editór       : Cançio Ximenes  

PUBLISIDADEiklan

HAKEREK NO HATÁN

Please enter your comment!
Please enter your name here