Sekretáriu Autoridade Munisípal Baucau, Simão dos Santos Marques Pinheiro. Imajen Agência TATOLI/Natalino Belo.

BAUCAU, 20 outubru 2021 (TATOLI)— Administrasaun munisípiu Baucau propoin millaun $4,538,264 iha Orsamentu Jerál Estadu (OJE) tinan fiskál 2022.

Sekretáriu Autoridade Munisipál Baucau, Simão dos Santos Marques Pinheiro, esplika antes ne’e propoin millaun $9-resin maibé hetan redusaun iha Komité Revizaun Orsamentu nível Polítika (KROP).

“Proposta orsamentu tinan fiskál 2022 ne’ebé autoridade munisípal aprezenta ba Ministériu Finansa millaun $9-resin maibé pasa de’it $4,527.464 (maibé iha livru 3-B $4,538,264). Orsamentu refere inklui ona subsídiu transporte ne’ebé Konsellu Ministru aprova funsionáriu rejime jerál sei hetan subsídiu,” Sekretáriu Munisípal ne’e ko’alia iha nia kna’ar-fatin, Vila Nova, kuarta ne’e.

Maske nune’e, tuir livru orsamentu 3-B (Munisípiu) ne’ebé Agência TATOLI, asesu hosi Parlamentu Nasionál, katak autoridade munisipál Baucau nia proposta ba OJE 2022 hamutuk tokon $4,538,264.

Orsamentu hirak-ne’e aloka tuir liña orsamentu serbisu setoriál no sekretariadu munisipál nian. Hosi totál orsamentu akumula ona kustu ba merenda eskolár, alfabetizasaun, konsensaun eskolár tokon $1.6 no ba projetu reapropriasaun Programa Dezenvolvimentu Integradu Munisipál (PDIM) rihun $392.9.

Hosi montante millaun $4,538,264 ne’e koloka ba saláriu no vensimentu 1,654,506, bens (sasán) no servisu rihun $834,630, kapitál dezenvolvimentu rihun $392,908, transferénsia públika millaun $1,656,220, laiha kapitál minór.

Montante orsamentu millaun $4,538,264 ne’e koloka ba programa ho kódigu 026 kona-ba estrada  no ponte sei gasta rihun$112,587, programa ho kódigu 028 kona-ba dezenvolvimento rurál no urbanu ho despeza rihun $392,908.

Programa ho kógidu 366 kona-ba seguransa nasionál sei gasta rihun $31,865, programa ho kódigu 392 kona-ba asesu ba justisa ho despeza rihun $35,791, programa ho kódigu 510 kona-ba boa governasaun no jestaun institusionál sei gasta millaun $1,950,441, programa ho kódigu 797 kona-ba agrikultura sei gasta rihun $505,359, programa ho kódigu 798 kona-ba água no saneamentu sei gasta rihun $125,674.

Nune’e mós programa ho kódigu 805 kona-ba saúde sei gasta rihun $296,608, programa ho kódigu 979 kona-ba edukasaun no formasaun sei gasta rihun $995,326, programa ho kódigu 980 kona-ba igualdade jéneru no inkluzaun sosiál sei gasta rihun $68,706 no programa ho kódigu 982 kona-ba turismu ho despeza rihun $22,999.

Ezekusaun OJE 2021

Taxa ezekusaun orsamentu iha Munisípiu Baucau dadaun ne’e atinje 58% hosi totál orsamentu millaun $ 5.702.031 tinan 2021.

Sekretáriu Autoridade Munisípal Baucau, Simão dos Santos Marques Pinheiro, hateten tinan ida-ne’e taxa ezekusaun ladún sa’e tanba inpaktu hosi pandemia COVID-19.

“Ohin to’o iha momentu ida-ne’e ita iha ona 58%, bainhira sura ho komitmentu no obrigasaun ne’ebé ita halo, hein de’it prosesu finalizasaun hamutuk 68%, purtantu ami bele garante katak iha 2021 ita bele ezekusaun 78% inklui ho projetu PDIM,” nian katak.

Notísia relevante:RAEOA propoin millaun $84-resin iha OJE 2022

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here