SekretÁria Rejionál ba Asuntu Edukasaun, Solidariedade Sosial no Inkluzaun, Avelina da Costa. Imajen Agência TATOLI /Abílio Elo Nini.

OÉ-CUSSE, 19 outubru 2021 (TATOLI)— Autoridade Rejiaun Administrativa Espesiál Oé-Cusse Ambeno (RAEOA), loke konkursu atu rekruta profesór hamutuk na’in-58 nune’e hasa’e kualidade edukasaun iha ensinu aprendizajen.

Sekretária Rejionál ba Asuntu Edukasaun, Solidariedade Sosiál no Inkluzaun, Avelina da Costa, esplika, daudaun ne’e loke konkursu públiku ba profesór na’in-58, atu hasa’e kualidade edukasaun iha ensinu aprendijazen, no loke konkursu públiku ba tékniku administrasaun vaga-ualu (8). Hosi profesór na’in lima nulu-resin ualu (58) ne’e kompostu hosi asistente ba profesór iha vaga 22.

Profesór na’in-58 ne’e koloka hodi hanorin iha Eskola Sekundária Jerál (ESG, sigla portugés), no profesór Grau E iha vaga 36. Profesór hirak-ne’e mós sei koloka ba Ensinu Báziku Sentral (EBC, sigla portugés) no Ensinu Báziku Filiál (EBF) iha territóriu Oé-Cusse.

Purtantu, rekrutamentu ba tékniku administratasaun hamutuk na’in-24 fahe ba grau tolu maka hanesan, grau C vaga-rua (2), grau D iha vaga-ualu (8) no grau E iha vaga 14.

Nia tenik, rekrutamentu ne’e bazea ba despaxu hosi Prezidente Autoridade Rejiaun Administrativa Espesiál Oé-Cusse Ambeno (RAEOA) ho númeru referénsia 467/DRHF/SRESS/RAEOA-ZEESM-TL/IX/2021, atu halo rekrutamentu ba profesór no pesoál serbisu administrasaun iha Sekretaria Rejionál Asuntu Edukasaun, Solidariedade Sosiál no Inkluzaun.

Tanba ne’e  maka Sekretaria Rejionál Asuntu Edukasaun Solidariedade Sosiál no Inkluzaun loke vaga ba konkursu públiku hamutuk ema na’in-ualu (8) ba grau sira maka hanesan asistente profesór hamutuk vaga 22, profesór grau E hamutuk vaga 36.

Nune’e mós tékniku profisionál grau C hamutuk vaga (2), tékniku profisionál grau D hamutuk vaga (7), tékniku administrativa grau E hamutuk vaga 14. Prosesu hatama dokumentu hahú hosi loron 18 outubru to’o 26 outubru 2021.

“Tanba ita-nia manorin iha eskola sira sei menus, entaun polítika autoridade hakarak hasa’e kualidade edukasaun tanba ne’e maka ita hahú loke vaga, no vaga ne’e sei termina iha 26 outubru depois ita halo selesaun dokumentu, hotu tiha maka tama ba faze teste ba aplikante sira,” nia dehan.

Nia dehan, rekrutamentu ne’e seidauk iha serteza atu kobre hotu eskola sira iha RAEOA, nune’e bainhira eskola sei menus, sei loke-tán vaga etapa tuir mai, no tuir planu kandidadatu foun daudaun ne’e mai aplika iha vaga dahuluk ne’e, posibilidade sei uza orsamentu tinan 2022.

Totál profesór iha RAEOA hamutuk na’in-869 kompostu hosi permanente na’in-450, kontratadu 369.

Totál EBF hamutuk 71, EBC 20, ESG públiku no privada hamutuk lima (5), eskola téknika vokasionál haat (4) no eskola pre-eskolár 14.  Nune’e totál hamutuk eskola públika iha RAEOA hamutuk 102 no eskola privada 12, totál 114.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

1 KOMENTÁRIU

  1. Hein katak la iha politizasaun, hanesan saida maka akontese to’o agora. Hein katak rekruta duni lisensiadu ka baxarel hussi bakcground edukasaun nian duni, tanba selae edukasaun sei la ba oin.

HAKEREK NO HATÁN

Please enter your comment!
Please enter your name here