Komunidade sira kontinua simu vasina iha Sentru Saúde sira iha Dili, Tersa (12/10). Imajen Tatoli/Antonio Goncalves.

DILI, 19 outubru   2021 (TATOLI)— Sala Situasaun, Sentru Integradu Jestaun Krize (CIGC, sigla Portugés) rejista ema na’in-ida mate, pozitivu lima, rekuperadu 29 no kazu ativu 73.

“Ohin, óbitu ida (mane) ho idade tinan 31, hela iha Covalima ho vasina la kompletu.  Iha 13 outubru 2021 diagnóstikadu sindroma insufisiénsia respiratória aguda tanba Covid-19. Nune’e iha loron ne’e kedas hala’o tratamentu iha Lahane. Horikalan tuku 20:40, matebian iis-kotu,” Koordenadór Forsa-Tarefa ba Prevensaun no Mitigasaun, Rui Maria de Araújo hateten liuhosi nota ne’ebé Agência TATOLI asesu, tersa ne’e.

Daudaun ne’e, família matebian kolabora ho ekipa saúde hodi hala’o funerál tuir protokolu saúde ne’ebé adopta iha Timor-Leste.

Nune’e, totál kazu konfirmadu kumulativu iha Timor-Leste hahú 21 marsu to’o 18 outubru 2021 hamutuk 19.725 no kumulativu óbitu 120.

Hosi totál kazu detetadu foun ho idade 20 na’in ida (27,2%), idade entre tinan 12 to’o 59 na’in-tolu (60%), idade 60 na’in ida. Hosi kazu ne’e na’in haat 80% hatudu sintoma.

Hosi horisehik mai ohin, Laboratóriu Nasionál Saúde halo teste PCR hamutuk 68, kompostu vijilánsia sentinela tolu, rastreiu ba kontaktu na’in-ida,  rastreiu aleatóriu  nain-21, viájen internasionál  39, follow up iha kuarentena na’in-lima.

Totál teste PCR ne’ebé halo iha loron 18 outubru  iha munisípiu-sira seluk, RAEOA no HNGV hamutuk 202 , kompostu Maubisse 18, Maliana 13, Viqueque  laiha, Suai laiha, Baucau 59,  Ermera tolu,  RAEOA laiha,  HNGV 91,  Lautém neen, Vera-Cruz 12.

Populasaun elijível tinan 18 ba leten, ne’ebé simu ona vasina iha loron 19 outubru tuir sistema informasaun Saúde iha Ministériu Saúde kumulativu 1ª doze iha Dili (84,0%) no kumulativu 2ª doze iha Dili (71,7%).

“Ema ne’ebé simu ona vasina doze dahuluk iha Timor Leste (68,3%) no simu ona doze daruak  (43,9%),” Rui Araújo akresenta.

Alende ne’e, hosi insidénsia COVID-19 iha Timor-Leste, durante loron hitu ikus maka 0,5/100 mil abitante, enkuantu ba de’it munisípiu Dili 1,1/100 mil abitante.

Iha loron 19 outubru 2021, izolamentu Vera Cruz, Lahane, HNGV no fatin seluk iha territóriu laran halo tratamentu hospitalizadu ba kazu detetadu pozitivu na’in-sia, kompostu kazu grave na’in-ida, moderadu na’in-neen no kaman na’in-rua.

Notísia relevante: COVID-19:  kazu detetadu foun 11 no ativu 98

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here