Imajen/Mídia PR.

DILI, 18 outubru 2021 (TATOLI)—Prezidente Repúblika, Francisco Guterres Lú Olo, hateten prezensa Misaun Akonsellamentu Eleitorál Organizasaun Nasaun Unida (ONU) importante atu hametin eleisaun jerál ne’ebé transparante no iha lejitimidade demokrátiku, liu-liu iha situasaun pandemia COVID-19 nia laran.

Prezidente Repúblika hateten teknikamente Sekretáriu Téknika Administrasaun Eleitorál (STAE) no Komisaun Nasionál Eleisaun (CNE, sigla portugés) mak sei tau matan ba eleisaun jerál. Prezensa Misaun Akonsellamentu Eleitorál ONU nian importante tebes tanba eleisaun jerál sei hala’o iha pandemia COVID-19 nia laran.

“Eleisaun nu’udar mekanizmu importante ba sidadaun ida-idak ezerse sira-nia direitu liuhosi votu hodi deside sé mak atu ukun no partidu polítiku sira-ne’ebé manán eleisaun tenke implementa sira-nia kompromisu polítiku,” Prezidente Repúblika hateten lliuhosi nota ne’ebé Agência Tatoli asesu, segunda ne’e.

Ofisál Misaun Akonselamentu Eleitorál reprezenta Sekretáriu Jerál ONU nian servisu ba Divizauun Asisténsia Eleitorál hosi Departamentu ba Asuntu Polítiku no Harii Dame, Zoran Trajkovski, agradese tanba ba Prezidente Repúblika depozita fiar ba Nasaun Unida no iha kompromisu atu apoiu  prosesu eleisaun iha Timor-Leste.

“Nasaun Unida sei  la servisu mesak. Sei servisu hamutuk ho parte hotu-hotu, ho ajensia sira no sosiedade sivíl,” nia dehan.

Misaun Akonselamentu Eleitoral ONU nian hala’o nia serbisu iha Timor-Leste hosi 07-21 outubru 2021 ho objetivu hetan koñesimentu kona-ba fatór no kestaun ne’ebé sei fó impaktu ba prosesu eleisaun, identifika lakuna iha atividade téknika ne’ebé la’o hela daudaun, no tuir planu estratéjia ba prosesu mobilizasaun rekursu no fornese konsellu ba Koordenadór Rezidente ONU iha Timor-Leste.

Zoran Trajkovski hateten, depois hala’o nia misaun iha Timor-Leste haree prosesu pozitivu balun no rona dezafiu tekniku hosi prosesu konsulta.

Iha biban ne’e, Zoran aprezenta felisitasaun hosi Sekretáriu Jerál Nasaun Unida, António Guterres, ba Prezidente Francisco Guterres Lú OLo.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here