Klibur Estudante Juventude Oe-Leu (KEJO), realiza jogu amizade ba dala-VIII. Imajen Agência TATOLI/ Sergio da Cruz.

BOBONARO, 18 outubru 2021 (TATOLI)— Klibur  Estudante Juventude Oe-Leu (KEJO), suku Oe-Leu, postu administrativu Bobonaro, munisípiu Bobonaro, abertura jogu amizade Oe-Leu Cup ba dala-VIII hodi selebra masakre Santa Krúz.

Jogu ne’e abertura ofisialmente hosi Administrador Postu Administrativu Bobonaro, Juvinal Leto Mau dos Santos, akompaña hosi xefe suku Oe-Leu, Januário Meta Tae Bragança no lia-na’in uma-lisan hitu iha suku refere.

Iha Jogu Abertura ne’e, Malilait FC derrota 3-1 kontra Blockir FC, enkuantu jogu ne’e  lidera hosi árbitru Jefrianos Loi Maia dos Santos, Domingos Vicente, Mateus Marques da Cruz, no ofisiál árbitru Ricardo Verdiál. Árbitru Hirak-ne’e mai hosi Asosiasaun Futebol Bobonaro (AFB), ne’ebé hetan ona sertifikadu nível C no D hosi departamentu arbritrajen FFTL nian.

Prezidente Komisaun Organizadora, Alvaro do Rego, informa jogu ne’e realiza atu komemora loron istóriku masakre santa Cruz 12 de Novembru, hodi dignifika no valoriza eroi ne’ebé sakrifika sira-nia an ba luta libertasaun nasionál iha 1991.

“Jogu ida-ne’e inisiativa ami jovuntude suku Oe-Leu nian rasik, atu kontinua obra hirak-ne’ebé joven maluk

sira iha altura ne’ebá halo, nune’e jerasaun foun sira banati tuir sakrifísiu ne’ebé ita-nia luta na’in sira hatudu, atu ita bele karia amizade no armónia iha suku no postu administrativu Bobonaro, nune’e mós atu anima komunidade sira,” nia informa ba Jornalista sira iha Oe-Leu, segunda ne’e.

Nia esplika, liuhosi jogu ida-ne’e mós atu motiva joventude sira-nia vontade atu espresa sira-nia talentu iha mundu desportivu, nune’e bele hamenus konflitu iha suku laran hodi kontribui ba dezenvolvimentu nasionál.

“Jogu ne’e kada tinan ita realiza, atu ita-nia alin joven sira iha Bobonaro ne’ebé durante ne’e subar hela sira-nia talentu, mai hatudu jogu iha kampu, depois bele iha mentalidade di’ak atu hanoin de’it atu dezenvolve nia-aan, entaun hosi ida-ne’e sira la hanoin ona atu halo problema,” nia dehan.

Administradór Postu Administrativu Bobonaro, Juvinal Leto Mau dos Santos, louva inisiativa juventude suku Oeleu, ne’ebé iha hanoin di’ak atu anima komunidade Bobonaro.

“Ha’u husu atu jogu ne’e iha kontinuidade, atu ita-nia joven sira labele envolve demais iha konflitu, maibé importante liu mak tenke jogu ho disiplina, hatudu tékniku di’ak atu ita bele finaliza ho susesu,” Administradór Postu Administradór Bobonaro ne’e fó hanoin.

Xefe suku Oeleu, Januário Meta Tae Bragança, husu governu kompetente atu apoia eventu ne’e, tanba estudante suku Oe-Leu iha vontade forte atu akumula joven suku 18 tomak hodi kria pás no estabilidade iha postu administrativu refere.

“Tinan-tinan governu sempre apoia, maibé foin iha  tinan ne’e mak governu la apoia, maibé ho kontribuisaun ita-nia komunidade no inteletuál sira hola inisiativa ida ne’e, maske hasoru obstákulu oinoin maibé konsege realiza duni, tanba ne’e presiza mós apoia hosi governu nune’e eventu ne’e bele la’o di’ak liután,” nia katak.

Klubu ne’ebé kompete iha eventu ne’e hamutuk 14, kompostu hosi suku Malilait, Bobonaro, Ai-Asa, Tapo, Karabau no Oe-Leu, inklui mós klubu ida hosi suku Holsa, postu administrativu Maliana, munisípiu Bononaro.

Entretantu fundu ba realizasaun eventu ne’e mai hosi kontribuisaun komunidade suku Oe-Leu no prosesu rejistrasaun administrasaun kada klubu ho totál $350-resin. Enkuantu hosi klubu 14 ne’e, primeiru lugár sei hetan osan $150 ho taxa, segundu lugár $80 dolar ho taxa no terseiru lugár $50.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here