Membru PNTL sira transporta arguidu na’in-rua ho inisiál AS no AFS hafoin TDB aplika prizaun preventiva, Segunda (18/10). Imajen Agência TATOLI/Natalino Belo.

BAUCAU, 18 outubru 2021 (TATOLI) – Tribunál Distritál Baucau (TDB) aplika prizaun preventiva ba arguidu ho inisiál AS no AFS ho kazu krime omísidu agravadu hasoru vítima Celestino Boavida ‘Lemorai’ iha área Iraduisi, aldeia Wasufa, suku Namanei, postu admistrativu Quelicai, munisípiu Baucau.

TDB aplika prizaun preventiva bazea artigu 194 ne’ebé previstu iha Kódigu Prosesu Penál (CCP, sigla portugues).

“Arguidu na’in-rua rekoñese duni katak sira rasik mak halo, dahuluk tuda, kontinua tá-ain no liman no ikus tesi kakorok to’o hakotu iis,” Defensór Públiku, Germano Gusmão Ramos, ko’alia iha TDB,  segunda ne’e.

Enkuantu Tribunál Distritál Baucau aplika TIR ba arguidu LMS maibé bainhira Tribunál no Ministériu Públiku (MP) presiza atu kontinua investiga arguidu tenke marka prezensa.

Razaun tanba arguidu la envolve bainhira mosu akontesimentu refere, hafoin lezadu hakotu iis mak to’o iha fatin tanba ta’uk entaun arguidu halai.

“Em prinsípiu arguidu nain-rua mak halo asaun tá to’o lezadu hakotu iis”,  Germano akresenta.

Kazu omísidiu ne’e akontese iha área Iraduisi, aldeia Wasufa, suku Namanei, postu administrativu Quelicai, munisípiu Baucau iha loron kinta (14/10).

Motivu hosi akontesimentu ne’e tanba kazu rai ne’ebé akontese antes iha loron 16 setembru 2021 no kontinua to’o lezadu lakon vida.

Nune’e mós arguidu tá lezadu tanba hetan informasaun hosi telefone hosi inan katak lezadu ameasa atu oho suspeitu na’in-rua nia inan iha loron akontesementu.

“Ministériu Públiku akuza arguidu na’in-rua komete krime omísidu agravadu ne’ebé previstu iha artigu 139 Kódigu Penál (CP, sigla portugés) no ameasa prizaun tinan 12-25 no arma branka tinan 3 to’o 6,” Germano argumenta.

Polísia Nasionál Timor-Leste (PNTL) Munisípiu baucau rasik konsege kaptura arguidu inisiál AS idade 25 iha área Ukamumu entre suku Namanei no suku Afaça, postu administrativu Quelicai iha loron sesta (15/10) maizumenus 03:00 dadersan ho evidénsia katana.

Enkuantu arguidu na’in-rua seluk ho inisial LMS ho idade 21 no AFS idade 33, PNTL kaptura iha área Uasufa, Namanei ho evidensia katana rua.

Durante julgamentu, suspeitu na’in-tolu hetan asisténsia legál hosi Defensór Públiku, Germano Ramos, Ministériu Públiku reprezenta hosi Prokuradór Bartolomeu de Araújo no prezide hosi Juiza, Jumiaty Maria Freitas.

Jornalista : Natalino Belo

Editór : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here