Dili Internasionál Filme Festival (DIFF), hatudu filme 20 ne'ebé kompete iha kompetisaun Filme Badak DIFF 2021 ba audiénsia sira. Iha kampu Benfica, sabadu (16/10). Imajen Tatoli/Francisco Sony

DILI, 17 outubru 2021 (TATOLI)— Grupu The Gajag Boys sai vensedór iha kompetisaun nasionál filme badak ho titúlu filme freedom 21 hosi Dili International Film Festival (DIFF) 2021 ho temátiku Liberdade 2021.

Diretór Grupu The Gajag Boys, Romario Viegas Francisco Marchal. Imajen Tatoli/Francisco Sony

Diretór Grupu The Gajag Boys, Romario Viegas Francisco Marchal, hateten, prémiu ne’ebé sira hetan signifikadu boot tebes ba sira, tanba sira bele hola parte iha Dili International Film Festival (DIFF) ne’ebé konesidu iha Timor-Leste.

“Ami orgullu bele kontribui ideia kreativu no emosaun liuhosi produsaun filme DIFF 2021 nian ne’ebé ligadu ho tema liberdade iha tinan 2021,” Diretór Romário, hateten, hafoin simu prémiu hosi DIFF, iha Benfica Dili, sábadu ne’e.

Esénsia hosi filme freedom 21 atu fó mensajen ba públiku kona-ba Covid-19. Tanba pandemia globál halo ema barak lakon nia liberdade hanesan prosesu aprendizajen iha eskola.

Aleinde ne’e, fó limitasaun liberdade ba inan-aman atu halo negósiu, no situasaun ne’e rasik bandu ema barak halibur malu iha fatin públiku no laiha liberdade ba ema atu espresa sira-nia sentimentu relijiozu iha igreja sira.

“Ida-ne’e hanesan liberdade ne’ebé ema lakon ona iha tempu barak no iha tinan 2021 sai hanesan tempu rekuperasaun ba Timor-Leste atubele fó fila-fali liberdade ida-ne’e ba ema hotu,” Dirijente Grupu The Gajag Boys akresenta.

Durante prosesu produsaun filme, nia dehan hasoru difikuldade  liuliu tempu ne’ebé limitadu tebes tanba situasaun COVID-19,  maibé kontinua fiar aan hodi finaliza produsaun filme ne’e.

“Ami hanoin iha tempu agora presiza kriadór filme sira nia ideia, kreatividade no imazinasaun atu prodús filme hodi bele konvense ema barak,” Nia fó hanoin.

Diretora Dili Internasionál Filme Festival (DIFF), Lena Lenzen. Imajen Tatoli/Francisco Sony

Iha biban, hanesan, Diretora Dili International Film Festival (DIFF), Lena Lenzen, hateten DIFF realiza eventu kompetisaun filme dala-tolu ona hodi hare’e katak tékniku ba produsaun filme sa’e makas iha Timor-Leste.

“Ha’u espera eventu workshop sira relasiona ho produsaun filme importante tanba fó koñesimentu tékniku foun ba kriadór filme sira atubele hadi’a tékniku produsaun filme iha Timor-Leste,” Lena Lenzen, hateten.

Ekipa DIFF orgullu ba eventu tinan ida ne’e, tanba iha partisipasaun a’as hosi kriadór filme sira no berani atu ko’alia fó sai sira-nia istória iha Timor-Leste.

Filme sira ne’ebé kompetetór sira prodús, haree mós hosi júri sira iha rai-liur hanesan hosi Japaun, Austrália nomós espesiál ba produser filme Balibo Five, Robert Connolly.

Ekipa júri ba kompetisaun filme DIFF 2021 nian mai hosi timoroan nain-12 no na’in-neen ema internasionál.

“Sira hotu rekoñese talentu timor-oan sira nian, halo ha’u orgullu no DIFF bele kontribui oituan ba dezenvolvimentu filme iha Timor-Leste,” nia salienta

Embaixador Uniaun Europeia ba Timor-Leste. Andrew Jacobs. Imajen Tatoli/Francisco Sony

Embaixadór Uniaun Europeia ba Timor-Leste, Andrew Jacobs, dehan Uniaun Europeia sai patrosinazadór ba kompetisaun nasionál filme badak DIFF 2021 nian, fiar ida-ne’e maka feramentu di’ak atu apoiu dezenvolimentu kompeténsia no talentu kriadór filme foin-sa’e sira iha Timor-Leste. 

“Ita hotu konkorda kualidade hosi ideia sira konta istória ka story telling intersante, tanba bele haree prespetiva diferente hosi grupu sira ho temátika liberdade 2021,” nia dehan.

Tanba ne’e, Uniaun Europeia admira ho motivasaun ba antusiasmu no determinasaun hosi produser filme foin-sa’e sira atu bele produs filme durante situasaun COVID-19.

Filme ne’ebé sai manan na’in ba iha kompetisaun nasionál filme badak DIFF 2021 ho temátiku ‘liberdade 2021’ hanesan, vensedór dahuluk hosi Grupu The Gajag Boys ho títulu freedom 2021, vesedór daruak grupu Nocollide Entertainment, títulu Silénsiu Hosi Kadeia, no vensedór da-tolu mak grupu Bihana Production títulu Kbiit Buibere 1998.

Enkuantu, Manan na’in ba filme favóritu hosi audiénsia maka grupu Nocollide Entertainment ho títulu Silénsiu Hosi Kadeia.

Tuir dadus ne’ebé asesu iha portál youtube DIFF nian vensedór dahuluk hetan osan montante $600, daruak $300, no vesedór ikus $150 no vensedór favóritu hetan $150.

Grupu ne’ebé rejistu ba iha Kompetisaun Filme Badak DIFF 2021 hamutuk 20, ida-idak ho nia istória sira ne’ebé mesak furak bazeia ba temátiku liberdade 2021 nian.

Jornalista: Francisco Sony

Editór : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here