Husi karuk, Komandante Jerál PNTL, Komisariu Polisia Faustino da Costa, Ministru Interiór Interinu, Filomeno da Paixão de Jesus, koversa ho Provedora, Jesuina Maria Ferreira Gomes iha abertura semináriu ho tema “Knaar Polisia Atu Hamtin Protesaun Direitus Umanus” iha salaun Timor Plaza, Dili. Imajen/Eugénio Pereira

DILI, 15 outobru 2021 (TATOLI)- Prevedória Direitu Umanu no Justisa (PDHJ, sigla Portugés), hamutuk Polísia Nasionál Timor-Leste (PNTL) lansa manuál matadalan formasaun direitu umanu ba  membru  polísia.

“Manuál ne’e sai hanesan matadalan ba formadór no fasilitadór  atu uza fó formasaun ba membru PNTL sira. Ba dahuluk, atu uza hodi hanorin ba membru PNTL nain-50 iha munisípiu Lautém no Viqueque,” Provedora Direitu Umanu no Justisa, Jesuina Maria Ferreira Gomes, hateten hafoin lansa manual matadalan direitu uma ba membru PNTL iha Caicoli, sesta ne’e.

Matéria iha manuál ne’e foku kona-ba kna’ar PNTL ho direitu umanu, polisiamentu ho uza forsa, polisiamentu iha kapturasaun no detensaun, polisiamentu ho direitu umanu ba ema vulneravel inklui mos matéria kona-ba jéneru.

“Manuál formasaun direitu umanu ba membru PNTL ne’e introdusaun knaar PNTL nian liga ba direitu umanu bainhira halo atuasaun no buska, inklui asegura direitu hasoru ema funeravél sira sein diskriminasaun,” nia afirma.

Iha biban hanesan, Komadante Jerál Polisia Nasionál Timor-Leste (PNTL), Komisáriu Faustino da Costa, dehan lansamentu manual matadalan ba direitu umanu importante ba PNTL tanba ko’alia kona-ba atendimentu polisiál ba públiku ka sidadun sira.

“Membru PNTL presiza tan formasaun kontinua direitu umanu atu hahú konsiénte iha atusaun labele ho emosaun, maibé tane aas direitu umanu,” Komisáriu Faustino afirma.

Komandu PNTL ho esperansa lansamentu manuál daruak direitu umanu ne’e bele eleva koñesimentu PNTL nian bainhira halo atendimentu públiku.

Tuir dadus hahú  tinan 2015 to’o 2019, Provedoria Direitu Umanu no Justisa (PDHJ) ho Unidade Asesória Direitu Umanu (UADU) iha Timor-Leste fó ona formasaun direitu umanu ba membru Polísia Nasionál Timor-Leste na’in 386, kompostu hosi feto na’in-55 no mane-331.

PDHJ hala’o akordu kooperasaun ho Sentru Formasaun Polísia (CFP, sigla Portugés) iha 2014 no renova fali kooperasaun ne’e iha tinan 2019 no 2021.

Jornalista: Natalino Costa

Editór : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here