Komunidade balun kontinua hela iha lona okos, tanba impaktu hosi inundasaun iha loron 04 abríl 2021, iha Manleuana, tersa (07/09). Imajen TATOLI/Francisco Sony

DILI, 14 outubru 2021 (TATOLI)—Vítima inundasaun uma-kain 48 ne’ebé daudaun kontinua hela iha sentru akollimentu iha Kampu Real Madrid Manleuana, hahú enfrenta difikuldade tanba lona ne’ebé sai mahon ba sira hahú nakles.

“Ami husu ba Governu atu fó apoiu materiál konstrusaun, nune’e ami bele fila ba ami-nia rai mamuk. Governu halo programa barak ba ami maibé rezultadu maka seidauk iha, di’ak liu ami fila ba ami-nia fatin tanba lona ne’ebé ami hela hahú nakles ona no tempu udan sei difikulta ba ami,” Vítima inundasaun, Maria Fátima, informa ba Agência TATOLI, iha Manleuana, kinta ne’e.

Daudaun ne’e, família hamutuk 135 mak sei iha sentru akollimentu estabelesidu iha Dili inklui iha Manleuana, ne’ebé hosi totál ne’e, na’in-69  konkorda fila ba hela fatin iha munisípiu no restu koordena ho Governu hodi muda ba fatin provizóriu.

Governu liuhosi Ministériu Administrasaun Estatál (MAE) no Sekretaria Estadu Protesaun Sivil (SEPS) iha ona solusaun hodi muda vítima inundasaun sira ne’ebé daudaun iha sentru akollimentu ba alojamentu  temporáriu.

Notísia relevante: Governu planeia tau vítima inundasaun iha alojamentu temporáriu

Maria Fátima preokupa tanba agora tempu udan, bainhira laiha fatin provizóriu ba sira, maka sei hasoru difikuldade boot tanba bee bele tama lona.

“Parte Governu iha fulan kotuk mai fó ona fó opsaun rua ba ami, atu mantein hela nafatin iha Dili ka bá munisípiu, ne’ebé ami deside iha ne’e, enkuantu uma-kain balun hili ba munisípiu maibé ikus mai laiha rezultadu, ne’ebé ami mós hanoin di’ak liu agora fó de’it materiál konstrusaun ba ami hodi hadi’a fatin mamuk ne’ebé sei iha hodi hela hein Governu halo Bairru foun mak ami ba hela tanba ami-nia oan sira kuaze eskola hotu iha Dili,” nia haktuir.

Notísia relevante: SETP hahú identifika fatin harii bairru foun ba afetadu inundasaun

Aleinde ne’e, Governu apoiu hahán ba abitante iha sentru akollimentu Manleuana, maibé la sufisiente.

“Governu distribui kada uma-kain ida hetan foos saka ida ho kilograma 25. Ida-ne’e la sufisiente tebes ba ami tanba ami balun ho oan barak no foos ne’ebé Governu lori mai ne’e semana rua dala-ida,” nia hateten.

Nune’e mós kona-ba bee-moos, semana ida kompañia lori dala-ida, tanba ne’e la sufisiente atu kobre nesesidade abitante sira.

Abitante prefere materiál konstrusaun uma

Iha biban hanesan, Koordenadór vítima inundasaun, José Abrão Tani, rekoñese kondisaun ne’ebé daudaun vítima sira enfrenta no nota katak la seguru tanba iha tempu bailaron vítima balun ho oan nurak.

“Governu iha promesa barak, maibé rezultadu laiha, di’ak liu apoiu materiál konstrusaun ba vítima sira ida-idak halo ninia uma hodi hela tanba vítima sira barak lakohi fila ba munisípiu, agora hela nafatin iha lona okos, ne’ebé kondisaun la permite no terus loos,” nia preokupa.

Koordenadór ne’e konta tuir, dalaruma vítima sira buka bee-moos iha viziñu sira, ne’ebé tenke la’o ain dook mak kuru bee. Agora vítima sira besik semana ida ona la simu bee-moos,” nia akresenta.

Enkuantu, kona-ba ba saúde públika ba vítima sira, tuir Koordenadór ne’e atendimentu la’o di’ak tanba kada semana pesoál saúde sira hosi sentru saúde Comoro sempre ba halo atendimentu ba vítima sira.

Xefe aldeia Lemocari, suku Manleuana, postu administrativu Don Aleixo, munisípiu Dili, Estaqui Tilman, hateten, preoukupasaun bee-moos sempre hato’o ba parte relevante maibé rezultadu mak nafatin hela de’it.

Tuir observsaun Agência TATOLI iha terrenu, nota karak tanke bee-moos nia ne’ebé tau iha sentru akollimentu Kampu Real Madrid Manleuana hamutuk neen no haris-fatin hamutuk 12 ho kondisaun di’ak, maibé bee mak laiha.

Antes ne’e, Governu planeia ona fatin implementa sentru akollimentu multifunsaun ba vítima inundasaun iha Manleuana no Metinaro.

Hafoin inundasaun iha loron 04 abríl 2021, ema hamutuk na’in-34 maka mate no na’in-14 maka lakon iha nível nasionál, família hamutuk 30.322 maka afeta ba inundasaun, ne’ebé entre família sira ne’e, família 24.816 hosi munisípiu Dili no uma hamutuk 4.231 mak hetan estragu totál.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here