Jogadór Boavista kamizola mean kinur kontrola bola iha joga Futsal Pra liga 2020/2021 , iha kampu Futsal Fatuhada, kuarta (13/10). Imajen Tatoli/Antonio Goncalves

DILI, 14 outubru 2021 (TATOLI)- Ekipa Kablaki FC obrigadu tenke sofre golu hitu bainhira kontra nia adversáriu AD Samoro iha jornada 15 Pra Liga Futsal Timor-Leste ne’ebé hala´o kinta kalan ne’e iha kampu futsal FALINTIL-Forsa Defeza Timor – Leste (F-FDTL) Fatuhada Dili.

Hanesan baibain ekipa rua ne’ebé hasoru malu iha kampu nia laran tenke utiliza tékniku no abilidade ne’ebé iha hodi lansa kontra malu hodi buka se los maka hatama golu.

Iha biban ne’e monu ba ekipa Kablaki FC no AD Samoro halo kontra no atake ne’ebé makas maibé oportunidade tur metin liu ba Samoro hodi konkista nia vitoria hodi hadau pontu tolu iha tabela klasifikasaun provijóriu.

Ho forsa no kapasidade jogu ne’ebé makas tebes iha menutu 2 jogadór Samoro Aristides Barros loke ona golu primeiru hodi muda kedan rezultadu ba 1-0, maibé liu de’it menutu balun jogadór Carlos Fernandes halo tan golu ida hodi tau rezultadu ba 2-0.

Jogu manas liu-tan, Samoro halo Kablaki tenke servisu makas iha kampu laran no halai to´o iis atu kotu sala-sala maibé la halo buat ida tanba Samoro kontinua domina bola iha menutu 20 ba parte dahuluk nian.

Nune’e hakat ba menutu 6 jogadór Aristides lansa tan golu ba da-tolu nian no konsege hatur rezultadu ba 3-0.

Kablaki la nonok de’it, halo kontra ho atake ne’ebé makas fó ameasa ba Samoro maibé la sai difikuldade ida tanba jogadór Samoro na’in lima iha kampu laran ne’e solidu tebes.

Ho amizade no solidu entre jogadór Samoro na’in lima ne’e iha menutu 16 fó tan oportunidade ba Aristides fura tan rede Kablaki hatur rezultadu ba 4-0 to´o menutu termina no laiha tan golu ruma nune’e Samoro provijóriu lidera jogu.

Dolar ba segunda parte ekipa hosi Munisípiu Manufahi ne’e halo autodefeza makas atu Samoro labele fura tan rede sira nian maibé esforsu hirak ne’e hela de’it hanesan esforsu tanba la hatudu prova.

Samoro festa golu nafatin ba rede Kablaki, iha menutu 24 jogadór José Vong lansa tan golu ida hodi halo dok liutan rezultadu ba 5-0.

Ho emosaun makas Kablaki nia jogadór Richal Laklak iha menutu 25 responde duni golu ida hodi fera mantolun ne’ebé mak sei tomak hela hodi nakfilak rezultadu ba 5-1.

Maibé golu ba Kablaki tenke hela de’it ho ida ne’e tanba jogadór Samoro la fó tan oportunidade liuhosi sira nia defeza ne’ebé metin halo Kablaki dudu la-ba.

Hosi estratejia jogu ne’ebé Samoro hatudu fó nafatin esperansa ba sira atu aumenta tan golu. Golu iha duni no aumenta bebeik iha menutu 34 Gilbraltar Freitas prodúz tan golu ida hodi lori semo Samoro nia golu dook ba bebeik hosi Kabalaki no eskore hatur ba 6-1.

La´os ne’e de’it iha menutu 37 Agripino Ximenes lansa golu ikus hodi hatur metin rezultadu ba 7-1. Hosi rezultadu ne’e Samoro mak iha direitu absoluta atu hetan pontu tolu no Kablaki tenke hakneak hodi fó “gloria” ba Samoro.

Hosi rezultadu ne’e lori semo kedan Samoro nia pontu ba 24 hodi tur iha liña 8 tabela klasifikasaun provijóriu. Enkuantu Kablaki nafatin mantein ho pontu 4 iha lina ikus liu ka lina mean.

Jornalista: Hortencio Sanchez

Editór: Florencio Miranda Ximnes

PUBLISIDADEiklan

HAKEREK NO HATÁN

Please enter your comment!
Please enter your name here