Traballadór Portu Tibar halo greve hodi husu direitu ba indemnizasaun. Kuarta (13/10). Imajen Tatoli/Egas Cristóvão

LIQUIÇA, 13 outubru 2021 (TATOLI)– Traballadór sira hosi Portu Tibar hamutuk 400-resin halo greve hasoru Ajénsia 2WJ tanba hakotu ona traballadór sira nia kontratu maibé la aplika indeminizasaun. 

Traballadór Portu Tibar greve hodi husu direitu ba indeminizasaun. kuarta (13/10). Imajen Tatoli/Egas Cristóvão

Portavóz traballadór iha Portu Tibar, Nicodino da Cruz, hateten durante sira servisu iha Portu ne’e ajénsia viola barak liu sira nia direitu hanesan traballadór. Tanba ne’e mak traballadór sira hotu foti desizaun hodi halo greve.

“Ami servisu iha ne’e hanesan “buruh kasar”, barak mak sai ona hosi ne’e, no sira ne´e maizmneus na’in 300 husi fulan sira ba kotuk to´o ohin loron sira hotu laiha osan indeminizasaun. Iha artigu 55 lei traballu nian fó dalan se kuandu traballadór ida servisu de’it fulan ida mós nia tenke hetan direitu ba ida ne’e, ida ne’e mak ohin ami halo asaun ne’e,”Portavóz ne’e dehan ba Agénsia Tatoli iha Portu Tibar, kuarta ne’e.

Nia dehan, dalabarak liu ajénsia utiliza fali artigu 11, 12 lei traballu ne’ebé ko’alia kona-ba funsionáriu ida ne’ebé kontratadu la liu tinan tolu (3) laiha direitu ba indeminizasaun.

“Maibé ida ne’e kontra fali ona artigu 55, tanba iha artigu 15 alinea 9 mós koalia klaru iha ne’ebá katak kompensasaun liga mós ba artigu 55, ajénsia tenke haree ida ne’e,” dehan reprejentante traballadór ne’e.

Nia reforsa, antes ne’e ajénsia hamosu iregularidade barak ba traballadór sira no nia rasik sai vítima ba hahalok ajénsia nian tanba traballadór hirak ne’ebé simu saláriu kada fulan $300 mai kraik, serbisu liu oras hanesan “overtime” ajénsia ko’a 10% ba sira. Ida  ne’e mak la justu.

Hatan ba kestaun ne’e, Jestór ajénsia 2WJ, Sebastião Pereira, deklara, traballadór hamutuk na’in 20 mak ajénsia hapara ona kontratu tanba sira nia loron kontratu mak hotu duni no haree mós ba servisu iha Portu ne’e mós besik finaliza ona.

“Ita la´os hapara sira, sira nia kontratu mak hotu ona entaun sira tenke hapara duni, haree mós ba servisu mós menus daudauk ona iha Portu ne’e, entaun tenke hamenus ema. Maibé sira na’in 20 ne’e la simu desizaun inklina fali ema barak hodi halo fali asaun ida ne’e, maibé buat hotu lao tuir nia dalan,” dehan jerente ne’e.

Nia haktuir, bazea ba traballadór sira nia kontratu ne´e ho tipu determinadu hanesan kontratu ida temporariamente atu hetan benefísiu oituan hosi empregadór.

“Se sira ezije sira nia “PHK”, bainhira sira servisu ne’e too ona tinan tolu ba leten, maibé sira nia servisu seidauk too tinan tolu ba leten. Ita bazeia ba lei laboral ne’ebé iha, iha artigu 11, 12 koalia momos kona-ba ida ne’e, maibé lei ha’u laos na’in ba ida ne’e, se sira la satisfaz ho desizaun ne’e bele hakat ba rezolve iha SEFOPE mak bele esplika klaru ba sira,” nia dehan.

Durante ne’e, ajénsia tau konsiderasaun ba traballadór sira hanesan saláriu désimu terseiru no atribui mós sertifikadu servisu nian durante ne’e.

Bainhira traballadór hirak ne’e nia kontratu atu remata iha loron 15 antes, ajénsia anunsia ona ba traballadór hirak ne’e.

“Sira nia kontratu atu hakotu, ami bolu sira ba koalia didiak, bolu sira atu priénse karta iha ne’ebá. Ita labele mai bosok malu, ha’u bele dehan ita labele mai bosok malu iha ne’e, ha’u mós traballadór timoroan iha fatin ida ne’e. Ita tenke tuir prosedimentu ne’ebé iha se ita halai ses hosi ida ne’e, há´u sente la dun los,” nia afirma.

Traballadór ne’ebé agora dadauk ajénsia 2WJ emprega hamutuk na’in 500-resin no kontratu balu nian remata ona, enkuantu totál traballadór ne’ebé sei ativu hela hamutuk na’in 490.

Jornalista: Hortencio Sanchez

Editór : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here