Prezidente Autoridade RAEOA, Arsénio Paixão Bano. Imajen Tatoli/Abilio Elo Nini.

OÉ-CUSSE, 13 outubru 2021 (TATOLI)— Autoridade Rejiaun Administrativa Espesiál Oé-Cusse Ambeno (RAEOA), liuhosi Unidade Ordenamentu Territóriu no Kadastru aloka $44.986,47 ba projetu Toponímia.

Orsamentu ho montante $44.986,47 ne’e atu estabelese plaka iha suku lima kompostu hosi Cunha, Lalisuk, Costa, Nipani no Lifau, perténsia ba sub-rejiaun Pante Makassar.

Projetu Toponímia ne’e dezeña hosi Eis Prezidente Autoridade RAEOA,  Mari Alkatiri, ne’ebé konsulta ona atubele estabelese iha zona sentrál Pante Makassar, kona-ba atu fó naran ba estrada, atravessa, avenida, rotunda ponte no fatin públiku sira, nune’e tinan ne’e autoridade deside re-ativa fali.

“Objetivu prinsipál hosi projetu Toponímia ne’e, atu fó naran ba fatin sira, estrada, ponte, rotunda, no fatin públiku sira. Segundu fó diresaun nu’udar giaun (matadalan) ba sidadaun estranjeiru,” Prezidente Autoridade RAEOA, Arsénio Paixão Bano, ko’alia iha edifísiu ZEESM, Oé-Cusse, kuarta ne’e.

Maske iha Oé-Cusse laran maibé presiza koñese fatin sira iha vila-laran, naran ba estrada, ponte no rotunda. Nune’e mós tenke tama iha sistema globál google-map atu ajuda sidadaun estranjeiru ne’ebé haraka mai Oé-Cusse, inklui fasilita atividade ekonomia bainhira haruka sasán ruma, persiza fatin ne’ebé klaru tanba iha futuru autoridade sei fó númeru kada uma nune’e fásil ba ema hotu atu asesu ho lalais.

Molok hahú projetu ne’e, autoridade RAEOA daudaun ne’e realiza ona diskusaun ho membru autoridadae, hodi konsulta ho konsellu konsultivu RAEOA ninian, tanba lei previstu ona.

Prezidente Autoridade sei konvida fila-fali konsellu konsultivu sira kompostu hosi xefe suku, jestór, veteranu, igreza no eis membru Governu sira iha RAEOA, atu deskuti naran ba avenida, atraveza no rotunda, ponte inklui fatin públiku sira, atu fó naran bazea ba naran istóriku, eroi sira iha Timor-Leste nomoos naran kultura Oé-Cusse nian.

Entretantu, prosesu atu halo obra ne’e, autoridade loke ona konkursu tenderizasaun ba projetu Toponímia ne’ebé sei ezekuta hosi empreza lokál Pandi Silnes Unipesoál, Lda, ho kontratu $44.290,70.

Plaka ba projetu Toponímia iha faze dahuluk hamutuk 287 plaka, kompostu hosi modelu tolu mak hanesan: plaka aruamentu tipu A ho kuantidade 121 unidade, ho valór orsamentu $14,686,83.

Modelu dahuluk plaka ne’e ho sentímetru 0,3, kuantidade sia (9) unidade, ho kontratu $1.144,39. Modelu daruak plaka ne’e ho sentímetru 0,2, kuantidade 112 unidade, ho kontratu $13.542,43.

Plaka aruamentu tipu B, ho kuantidade 62 unidade, ho kontratu $7.713,07.

Plaka tipu B ne’e kompostu hosi sentímetru 0,3, kuantidade 16 unidade, ho kontratu $2.096,37, modelu daruak hosi plaka ne’e sentímetru 0,2, kuantidade 46 unidade, ho kontratu $5,616,70.

Plaka aruamentu tipu C, ho kuantidade 104 unidade, ho kontratu $17.766,59 kompostu hosi modelu dahuluk sentímetru 0,3, kuantidade 24 unidade, ho kontratu $4.585,02, modelu daruak ho sentímetru 0,2, kuantidade 80 unidade, ho kontratu $13.181,57.

Jornalista: Abílio Elo Nini
Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here